ახალი წელი თითქმის მოვიდა და წარმოუდგენელია, მაგრამ ზოგიერთებს (განსაკუთრებით დაკავებულ ან განსაკუთრებით ზარმაც ადამიანებს) ჯერაც არ შეურჩევიათ საჩუქრები ოჯახის წევრებისთვის, მეგობრებისთვის თუ თანამშრომლებისთვის. თუ ამ სტატიას კითხულობთ, ალბათ, ამ ადამიანების რიცხვს უნდა მიგათვალოთ. ეგ არაფერი! ხელის ჩაქნევისათვის ჯერ ადრეა. შეგიძლიათ ამ სიიდან შეარჩიოთ საქართველოში დამზადებული საჩუქარი, ადრესატიც აღაფრთოვანოთ და წინასაახალწლოდ გულანთებული სტარტაპერებიც გაახაროთ.

ჩვენ ვეცადეთ, მოგვეძებნა ისეთი ბრენდები, რომლებიც თან კარგია და თან ქართულია:

1. კოდალას მოცეკვავე კაცუნები დეკორაციადაც შეიძლება ჩაითვალოს და სათამაშოდაც: შეგიძლიათ აჩუქოთ თქვენს ზრდასრულ და პატარა მეგობრებს

სოციალური საწარმო კოდალა ხის სათამაშოებსა და პაზლებს აწარმოებს. თითოეული ნივთი ეკოლოგიურად სუფთა გერმანული წარმოების საღებავითა და ლაქით არის დაფარული. საწარმოში პროფესიებს შეზღუდული შესაძლებლობების მქონე პირები და სოციალურად დაუცველი ახალგაზრდები ეუფლებიან.

2. 140-სანტიმეტრიანი ნამდვილი მოვერცხლისფრო-მოლურჯო ნაძვი Plant Shop-ისგან

ცოცხალი ნაძვის ხე დიდებული საახალწლო არჩევანია. გარდა იმისა, რომ ამით გარემოს დაცვას უწყობთ ხელს, ის ინტერიერს სასიამოვნო სურნელით აავსებს და ლეგენდების მიხედვით, იღბალსაც მოგიტანთ. 140-სანტიმეტრიანი მოლურჯო ნაძვის ფასი 150 ლარია.

3. თლილის ხისგან დამზადებული დეკორაციები, რომლებიც მთელი წელი სასარგებლო და გამოსადეგი იქნება ნებისმიერი ადამიანისთვის

თლილი არის ადგილი, სადაც შესაძლებელია როგორც არსებული დიზაინის შერჩევა, ასევე საკუთარი იდეების რეალიზება, ''თლილში" როგორც საყვარელი ადამიანებისთვის, ასევე თქვენი ოთხფეხა მეგობრებისთვისაც მოიძებნება საჩუქრები, და, რაც მთავარია, პროდუქციის შეძენით თქვენი წვლილი შეგაქვთ მიუსაფარ ბავშვთა სახლების ბენეფიციარების კეთილდღეობაში.

4. ეიფორიას თავის მოვლის საშუალებები

ეიფორია ქართული ბრენდია, რომელიც ბიოლოგიურად სუფთა, ნატურალურ, მცენარეულ ცხიმებზე დაფუძნებულ თავის მოვლის საშუალებებს და კოსმეტიკას ამზადებს. გარდა სასარგებლო თვისებებისა, პროდუქცია იმდენად სადღესასწაულოდ გამოიყურება, შეიძლება გამოყენება დაგენანოთ და მხოლოდ ყურებით დატკბეთ.

5. გარემოსთან მეგობრული პროდუქცია ზერო ეფექტისგან

#ჩაანაცვლე, ამ ნაკრების შეძენის შემთხვევაში თქვენ გახდებით იმ იდეის ნაწილი, რომელიც მიზნად ისახავს გარემოს დაცვას. ამ მაღაზიაში შეგიძლიათ იყიდოთ ნატურალური დეოდორანტები, ბამბუკის კბილის ჯაგრისები, ხის ელეგანტური თმის სამაგრები, მეტალის საწრუპები და სხვა ეკომეგობრული წვრილმანები.

ფასი: 36 ლარი

6. "ამოჭამეს" ჯადოსნური ყუთი უგემრიელესი წიწაკისა და კივის მურაბით, ხახვის მურაბითა და საავტორო ჩურჩხელებით

ამოჭამე ქართული კომპანიაა, რომელიც საუცხოო მურაბებს აწარმოებს. პროდუქცია მზადდება საქართველოში და დამზადების ტექნოლოგიაც და რეცეპტებიც მხოლოდ ქართულია. სტარტაპი ახალგაზრდა, ნიჭიერ, ქართველ გოგონებს ეკუთვნით.

ასე რომ, ამ ჯადოსნური ყუთის ჩუქებით თქვენს ადრესატს სრულიად ახალ შეგრძნებებს აჩუქებთ.

ფასი: 50 ლარი

7. წაღმა-უკუღმას ნაქსოვი ტანსაცმელი და აქსესუარები

წაღმა-უკუღმას ღუნღულა, ფერადი, ანტიალერგიული ტანსაცმელი იმ ადამიანს უნდა აჩუქოთ, ვის გაციებაზეც ყველაზე მეტს ინერვიულებდით.

ფოტოზე მოცემული ქუდები 20 ლარი ღირს

8. Flip პორტრეტი FlipShop.ge-სგან

პროდუქტის მთავარი მახასიათებელი მდგომარეობს იმაში, რომ ნებისმიერ მსურველს შუძლია ცოტა ხნით გახდეს ნამდვილი მხატვარი და შექმნას საკუთარი, ან საყვარელი ადამიანების პორტრეტები.

ასე რომ, თუ თქვენი ხატვის უნარები კუთხეში მიხატულ მზეს არ გასცდენია, ჯერაც არსებობს იმედი.

9. ჩიკატაის ხელნაკეთი მუსიკალური სათამაშოები გია ყანჩელის მელოდიით

გაიცანით ჩიკატაი!

სათამაშოები იქმნება ანტიალერგიული და ნატურალური მასალებისგან, თუმცა მთავარი უნიკალურობა ისაა, რომ ამ სათამაშოებიდან ლეგენდარული კომპოზიტორის, გია ყანჩელის მელოდია ისმის. ასე რომ, თუ თქვენი ადრესატი არც მეტი, არც ნაკლები, პატარა ბავშვია, ამაზე უკეთესს ვერაფერს აჩუქებთ.

ჩიკატაის პროდუქციას შორის შეხვდებით სათამაშო ქურციკსაც, რომელიც 20 ლარი ღირს.

ქურციკი საქართველოში გასული საუკუნის 60-იან წლებში გადაშენდა. ბუნების დაცვის მსოფლიო ფონდი WWF Georgia მათი აღდგენის პროექტს ახორციელებს და საქართველოში ქურციკების მეხუთე თაობა დაიბადა. მართალია, შედეგები იმედის მომცემია, მაგრამ სამუშაო ჯერაც ბევრია.

ქურციკის სათამაშოების გაყიდვიდან შემოსული მოგება სრულად მოხმარდება ქურციკების მონიტორინგისათვის საჭირო აღჭურვილობის შეძენას.

10. ქართული ტანსაცმელი და აქსესუარები ყველაზე ქართული შტრიხებით Ninellie • ნინელი-სგან

ნინელი ქართული ტანსაცმლის ბრენდია, რომელიც ბაზარზე რამდენიმე წელია არსებობს. მათი მაისურები, ჰუდები, ჩანთები ან კაბები გამორჩეულია იმით, რომ ნებისმიერ ადგილას ხაზს უსვამს საქართველოს ერთიანობას და ამ ტანსაცმლის ტარებით სიამაყის საფუძველსაც გაძლევს.

ნინელი საახალწლოდ 20%-35%-იან ფასდაკლებებს გვთავაზობს.

11. Baikia/ბაიკიას მიერ შექმნილი ხელნაკეთი აქსესუარები

ბაიკია თვითნასწავლი დიზაინერის მიერ პოლიმერული თიხისგან შექმნილი ხელნაკეთი აქსესუარების ბრენდია, რომელიც საკმაოდ ხელმისაწვდომ ფასად ამზადებს ორიგინალურ აქსესუარებს.

როგორც ფეიჯის აღწერიდან ჩანს, თითოეული სამკაული უნიკალურია.

12. ნაქსოვი ჩანთები Salomea • სალომეა-სგან

თუ სიქრეთ სანტაში თქვენს ადრესატს ძალიან უყვარს ჩანთები, მაშინ შეგიძლიათ სალომეას ჩანთები შეათვალიეროთ. რაც შეეხება ფასებს, საახალწლოდ ეს საჩუქარი თქვენს მთელ ხელფასს არ შეიწირავს.

ფასები 35 ლარიდან იწყება და დამოკიდებულია მოდელზე.

13. BlueTabla-ს ქართული თეფშები თქვენი საახალწლო სუფრისთვის

BlueTabla-ს თეფშებს "ზედ აწერიათ" წარმომავლობა ლურჯი სუფრისა და ქართული ანბანის ელემენტებით.

✔ თეფშები დამზადებულია უმაღლესი ხარისხის ფაიფურისგან.
✔ ირეცხება ჭურჭლის სარეცხ მანქანაში.
✔ შეგიძლიათ გამოიყენოთ მიკროტალღურ ღუმელში.

ფასი: 35 ლარი

14. Lacoaj • ლაკოაჟის მიერ შექმნილი კოლექცია, რომელიც აფხაზეთში გამოგზაურებთ

ლაკოაჟი გთავაზობთ რეტრო და თანამედროვე სტილის მაისურებს, რომელთაც სოხუმი, გაგრა, ოჩამჩირე და აფხაზეთში არსებული სხვა ადგილები აწერიათ.

"აფხაზეთი საქართველოა და ეს მხარე მხოლოდ ტკივლთან არ ასოცირდებოდა" - ეს არის ლაკოაჟის გუნდის მთავარი სათქმელი.

ფასები 15 ლარიდან 65 ლარამდე მერყეობს.

15. Dots & Dashes Georgia-ს სამკაულები მორზეს კოდით

ეს სამკაულები მხოლოდ წერტილებისა და ტირეებისგან არ შედგება. მათში სხვადასხვა სახელია დაშიფრული. შეგიძლიათ, კომპანიას სასურველი სიტყვაც შეუკვეთოთ ან თუნდაც საჩუქრის ადრესატის სახელი გამოსახოთ მორზეს კოდით.

შეძენა შესაძლებელია ონლაინ.