ფრაქცია ქართული ოცნების თავმჯდომარე მამუკა მდინარაძე უარყოფს Facebook-ის მიერ გავრცელებულ განცხადებას იმის შესახებ, რომ მმართველი გუნდი ასეულობით პროპაგანდისტული და დეზინფორმაციული გვერდისა და ანგარიშის უკან იდგა. მისი თქმით, საერთოდ არ არის გასაკვირი, რომ ამ გვერდების დიდი ნაწილი მათ უჭერდა მხარს და ნაციონალურ მოძრაობას უვრცელებდა ნეგატიურ ინფორმაციას.

სტატუსში, რომელიც დეპუტატმა Facebook-ის განცხადებასთან დაკავშირებით დაწერა, ის ისევ ნაციონალური მოძრაობას აკრიტიკებს. კერძოდ, მდინარაძე სტრატეგიული პარტნიორების ბოლოდროინდელ კრიტიკაზე ამახვილებს ყურადღებას და ამბობს, რომ ეს ენმ-ს თხოვნით ხდებოდა.

"მას შემდეგ, რაც ნაცმოძრაობამ და მისმა დანაყოფებმა ქვეყნის შიგნით ბოლოდროინდელი მოვლენების ფონზე განიცადეს სრული ფიასკო, დაკარგეს ის მხარდამჭერებიც, რაც აქამდე ყავდათ, ბოლო კვირების განმავლობაში ისტერიულად, პერსონალურად წერენ ნეგატიურ და ყალბ ინფორმაციებს ჩვენი პარტნიორი ქვეყნების კონკრეტულ წარმომადგენლებს თხოვნით — მათ გააკეთონ ნეგატიური კომენტარები საქართველოს ხელისუფლებაზე. ბოლო დღეებში შეგვიძლია გავიხსენოთ დასავლური ოფიციოზის პოზიციისგან განსხვავებული ერთი-ორი ასეთი განცხადებაც.

ასევე ბოლო კვირების განმავლობაში მთელი მათი პარტიული აქტივი (თავისი ბოტ-ტროლებით და ფეიკ-გვერდებით) ისტერიულად არეპორტებს ყველა იმ facebook მომხმარებელს და გვერდს, რომლებიც გამოხატავენ მხარდაჭერას სახელისუფლებო წრეების მიმართ და წერენ ნეგატიურად ნაცმოძრაობაზე", — წერს ის.

მდინარაძე, სავარაუდოდ, ნაციონალური მოძრაობის კვალს ხედავს Facebook-ის განცხადებაშიც, თუმცა არ განმარტავს, კონკრეტულად რას გულისხმობს.

"ამის დასტურია ისიც, რომ ნაცმოძრაობის არც ერთი ბოტი, ფეიკ-გვერდი თუ ყალბი ანგარიში, რომლებიც პირდაპირ ეწევიან დეზინფორმაციის გავრცელებას და სიძულვილის ენის ტირაჟირებას, facebook-ის მიერ გაუქმებული არ არის", — წერს ის.

გარდა ამისა, დეპუტატი გამოთქვამს მზაობას, რომ დაიწყოს მუშაობა რეგულაციებზე დეზინფორმაციის პრევენციისთვის, თუმცა ამბობს, რომ ამას მოწინააღდეგეები გამოუჩნდებიან. ხალხს, რომლებიც რეგულაციებს სიტყვის თავისუფლების დაცვის მოტივით გააპროტესტებენ, მდინარაძე უკვე აიგივებს ნაციონალურ მოძრობასთან.

"დარწმუნებული ვარ მალევე გამოჩნდებიან ამის წინააღმდეგ წამსვლელი ადამიანები და იტყვიან, რომ რისკის ქვეშ დგება სიტყვის თავისუფლება. ძნელი გამოსაცნობი არ არის, რომელი პოლიტიკური სუბიექტის წარმომადგენლები და მხარდამჭერები იქნებიან ეს ადამიანები".

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.