"საშინელებაა, თუ სიმართლეა", — ასე გამოეხმაურა ამერიკის ყოფილი ვიცე-პრეზიდენტის, ჯო ბაიდენის მრჩეველი თავდაცვის საკითხებში, მაიკლ კარპენტერი ქართულ ოცნებასთან დაკავშირებული ასეულობით ფეისბუქგვერდების შესახებ გავრცელებულ ინფორმაციას. აღნიშნული გვერდები, რომლებიც დეზინფორმაციას ავრცელებდნენ, ფეისბუქმა დაბლოკა.

"Facebook-მა დააკავშირა ანტიამერიკული და პრორუსული პოსტები სოციალურ მედიაში კომპანიასთან, რომელიც მმართველ პარტიასთან [ქართული ოცნება] არის ასოცირებული. იმედი მაქვს, რომ ეს მალე გაირკვევა", — წერს ის ტვიტერზე.

20 დეკემბერს ფეისბუქმა თავისი ძირითადი პლატფორმიდან ჯამში 396 გვერდი და ჯგუფი წაშალა. ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღმათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.