საკრებულოს დეპუტატმა ლევან ხაბეიშვილმა თბილისის საკრებულოს შენობა "დააბოქლომა". ლევან ხაბეიშვილი პოლიციამ საკრებულოს შენობიდან ძალით გამოიყვანა და შიგნით აღარ უშვებენ

"სიმბოლურად ედოს, მეტლარიანი ბოქლომიც არ ეკუთვნით, როგორი იაფფასიანებიც არიან ისეთი იაფფასიანიი ედოს. სხვა დანიშნულება ამ საკრებულოს ფაქტია, რომ არ აქვს, დააბრახუნებ, დაუძახებ, რომ შეგიშვან და მაინც არ გიშვებენ", — თქვა ლევან ხაბეიშვილმა.

დღეს, სამოქალაქო აქტივისტებმა და ოპოზიციის წევრებმა დეპუტატ ერეკლე კუხიანიძის კაბინეტში კარავი გაშალეს. ისინი მოითხოვენ, რომ საკრებულოს ქართული ოცნების წევრმა, ერეკლე კუხიანიძემ თანამდებობა დატოვოს. სამოქალაქო აქტივისტები მოგვიანებით საპატრულო პოლიციამ და დაცვის თანამშრომლებმა ოთახიდან ძალით გამოიყვანეს. მათ შორის იყო ლევან ხაბეიშვილიც, რომელსაც შენობაში აღარ უშვებენ.

რამდენიმე დღის წინ თბილისის საკრებულოს ქართული ოცნების წევრმა ერეკლე კუხიანიძემ საოკუპაციო რეჟიმის მიერ უკანონოდ დაკავებული ექიმი ვაჟა გაფრინდაშვილის ოჯახი პროვოკაციაში დაადანაშაულა და აგინა. მსგავსი შინაარსის კრიტიკული პოსტი კუხიანიძემ პირად ფეისბუქგვერდზე მას შემდეგ გამოაქვეყნა, რაც გაფრინდაშვილის ოჯახმა ოცნების ორგანიზებულ ღონისძიებაზე თქვა, რომ ზეიმის დრო არ არის. საკრებულოსთან ერეკლე კუხიანიძის გადადგომის მოთხოვნით აქცია გუშინ, 16 დეკემბერსაც გაიმართა. საკრებულოს თავმჯდომარემ აქტივისტებსა და ოპოზიციის წარმომადგენლებს უთხრა, რომ გუნდი გაივლიდა კონსულტაციებს და გადაწყვეტილებას მეორე დღეს გააცნობდნენ.