ანიმაციურ ფილმ Frozen 2-ის შემოსავლებმა უკვე ერთ მილიარდ დოლარს მიაღწია და ამით დისნეის მეექვსე პროდუქტი გახდა, რომლის კინოგაქირავებიდან მიღებულმა შემოსავლებმაც მილიარდ დოლარს გადააჭარბა.

მანამდე შემოსავლებით მსგავს წარმატებას მიაღწიეს შემდეგმა ფილმებმა: Avengers: Endgame ($2.79 მილიარდი), The Lion King ($1.6 მილიარდი), Captain Marvel ($1.2 მილიარდი), Toy Story 4 ($1.07 მილიარდი) და Aladdin ($1.05 მილიარდი). უკვე კი Frozen 2-ც შეურთდა მათ კლუბს.

დეკემბრის დასაწყისში გავრცელდა ინფორმაცია, რომ დისნეი ისტორიაში პირველი კინოსტუდია გახდა, რომლის შემოსავლებმაც ერთ წელიწადში $10 მილიარდს გადააჭარბა, რითიც ახალი რეკორდი დაამყარა. თანაც კინოთეატრებში ჯერ კიდევ არ გამოსულა Star Wars: The Rise of Skywalker — მისი პრემიერა 20 დეკემბერსაა დაგეგმილი.

Frozen-ის პირველი ნაწილი 2013 წელს გამოვიდა და ეს ანიმაცია მაშინვე წარმატებული გახდა: მისმა შემოსავლებმა $1.276 მილიარდი შეადგინა. შესაბამისად, გასაკვირი სულაც არ არის, რომ მისი შემდგომი ნაწილიც ასეთივე წარმატებული გამოდგა.

ეს მაჩვენებლები ერთგულ მაყურებლებს იმედს უტოვებს, რომ ელზასა და ანას ისტორიის გაგრძელებას კიდევ ვიხილავთ.