პრემიერის მრჩეველი რეგიონულ საკითხებში, სოზარ სუბარი დე-ფაქტო სამხრეთ ოსეთში უკანონოდ დაპატიმრებული ვაჟა გაფრინდაშვილის ცოლს უმტკიცებს, რომ ქართული ოცნების მიერ დღეს ორგანიზებული საზეიმო ღონისძიება არის გარანტი იმისა, რომ მომავალში გატაცებები არ ხდებოდეს. ასე უპასუხა მან გაფრინდაშვილის ცოლის განცხადებას იმის შესახებ, რომ ახლა ზეიმის დრო არ არის.

"სხვათაშორის, ახლა გამოვეხმაურები ვაჟა გაფრინდაშვილის მეუღლის გუშინდელ განცხადებას და მინდა ვთქვა, რომ სწორედ ის, რაც დღეს აქ ხდება არის გარანტი იმისა, რომ მომავალში აღარ იყოს მსგავსი გატაცებები და საერთოდ არ გვქონდეს ტერიტორიული მთლიანობის აღდგენის პრობლემა", — აღნიშნა სუბარმა.

გარდა ამისა, მან განაცხადა, რომ გაფრინდაშვილის საკითხს მთელი ქვეყანა განიცდის და ყველაფერი კეთდება მის გასათავისუფლებლად. ის გამოეხმაურა საკრებულოს წევრის, ერეკლე კუხიანიძის განცხადებასაც, რომელმაც გაფრინდაშვილის ოჯახს პროვოკატორები უწოდა და განაცხადა, რომ ეს სიტყვები არ მოეწონა.

ქართული ოცნება დღეს აქციას მართავს, რომელზეც ევროსაბჭოს თავმჯდომარეობა უნდა იზეიმონ. ამ ღონისძიებაზე არ არიან მიწვეული ევროპელი დიპლომატები და მხოლოდ პარტიის მხარდამჭერები შეიკრიბებიან. რაც შეეხება თავმდჯომარეობას, ეს ტიტული საქართველოს რეგლამენტის მიხედვით და ანბანის შესაბამისად ერგო.

"მინდა მივულოცო საქართველოს ხვალინდელი დღე, ის, რომ ანბანის მიხედვით გავხვდით ევროსაბჭოს თავმჯდომარე ქვეყანა. ძალიან საზეიმოა, მაგრამ საინტერესოა ვის გვეზეიმება და ვის არა. ევროსაბჭომ და საერთაშორიო ორგანიზაციებმა უნდა დაამტკიცონ და დაიცვან ადამიანის უფლებები, პირველ რიგში ტყვე ექიმის უფლება. ვნახოთ ხვალ ვის ეზეიმება და ვის არა", — ასე შეფასა ოცნების დღევანდელი ღონისძიება გაფრინდაშვილის ცოლმა მას შემდეგ, რაც ცნობილი გახდა, რომ ექიმი პატიმრობაში დატოვეს.

მან აღნიშნა, რომ ხელისუფლებაში საჭიროა უწყებათაშორისი კომისიის შექმნა, რათა კოორდინირებული რეაგირება ხდებოდეს გაფრინდაშვილის გატაცების საკითხზე. გარდა ამისა, მათ მოითხოვეს ორშაბათს შეხვედრა პრემიერ-მინისტრთან.

ამ განცხადების შემდეგ გაფრინდაშვილის ოჯახი ქართული ოცნების საკრებულოს წევრის თავდასხმის ობიექტი გახდა.

გაიგეთ მეტი: