დე-ფაქტო სამხრეთ ოსეთში უკანონო პატიმრობაში მყოფი ვაჟა გაფრიდანშვილის ოჯახი ორშაბათს, 16 დეკემბერს საქართველოს პრემიერ-მინისტრთან შეხვედრას ითხოვს. ამის შესახებ გაფრინდაშვილის ცოლმა მას შემდეგ განაცხადა, რაც ცნობილი გახდა, რომ დე-ფაქტო სასამართლომ გაფრინდაშვილი არ გაათავისუფლა.

ექიმის ოჯახი ასევე მოითხოვს უწყებათაშორისი კომისიის შექმნას, რომელშიც თავად და ოჯახის მეგობრებიც შევლენ. მათი თქმით, პრემიერი თავად უნდა ჩაერთოს ამ უწყებების კოორდინირებაში.

"ჩვენ არ უნდა ვახდენდეთ ამ უწყებებს შორის კოორდინაციას და ამბავი მიგვქონდეს ერთი უწყებიდან მეორეში", — განაცხადა გაფრინდაშვილის ცოლმა.

ექიმი ვაჟა გაფრინდაშვილი, რომლის სასამართლო პროცესი ცხინვალის რეგიონში დღეს გაიმართა პატიმრობაში დატოვეს. გაფრინდაშვილის შვილის ინფორმაციით, სასამართლო სხდომა ერთი კვირით გადაიდო, რის მიზეზადაც ის დაასახელეს, რომ ექიმი ჩვენებას არ ცვლის და ე.წ. საზღვარს არ აღიარებს.

ექიმი საოკუპაციო ძალებმა 9 ნოემბერს ე.წ. საზღვრის კვეთის ბრალდებით დააკავეს. ვაჟა გაფრინდაშვილი ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.