ჰომოფობიური ჯგუფების, ზნეობისა და ბავშვთა დაცვის საზოგადოეების განცხადებით, თბილისის საერთაშორისო კინოფესტივალზე ლგბტ თემატიკის ფილმების ჩვენებას ხელს შეუშლიან. მათი თქმით, დღეს 2 დეკემბერს კინოთეატრ ამირანთან აქცია-პიკეტს ჩაატარებენ და ამას ყოველ სეანსზე გაიმეორებენ.

აქციის ორგანიზატორები ამტკიცებენ, რომ And Then We Danced-ის მსგავსად, დღევანდელ სეანსზეც სურდათ ბილეთების ყიდვა, თუმცა ისევ ყველა გაყიდული დახვდათ.

"ისევ იმ პრინციპით იმუშავეს ალბათ, რომ წინასწარ იყიდეს ყველაფერი. ალბათ, შიგნით შესვლა არ გამოგვივა, მაგრამ გარეთ დავდგებით, ვეცდებით, რომ ჩვენ ჩვენი ვთქვათ", — გაანცხადა აქციის ერთ-ერთმა ორგანიზატორმა.

გურამ ფალავანდიშვილი განმარტავს, რომ ამჯერად ისინი ქართველი რეჟისორის თამარ შავგულიძის კომეტებსა და კიდევ ორ უცხოურ ფილმს უპირისპირდებიან. ფილმს, რომელიც ორი ქალის, ბავშვობის მეგობრების ხანგრძლივი სიყვარულის შესახებ გვიყვება, თბილისის კინოფესტივალზეც აჩვენებენ.

ფალავანდიშვილის თქმით, მართალია ამ ფილმს აპროტესტებენ, მაგრამ სეანსის ჩაშლის კონკრეტული გეგმა არ აქვთ, რადგან ახლა "პატარა ფესტივალზეა" საუბარი და არა "სახელმწიფო ინტერესით გამართულ სეანსზე". მისივე თქმით, ამ მიზეზის გამო მათ გვერდით არ იდგებიან ყოფილი თანამებრძოლები ჰომოფობიური ჯგუფები ქართული მარში, მმკ და ლევან ვასაძის მხარდამჭერები.

"ამ ფილმზებზე ისეთი აჟოტაჟი არ იქნება. აკინის ფილმი მაინც იყო შეურაცხყოფა ჩვენი ჩოხის, ცეკვის, ეროვნული ღირსების. ეს პატარა, ციდა ფილმებია და ფესტივალის ფარგლებში გადის", — განაცხადა გურამ ფალავანდიშვილმა.

მის შვილს, ალექსანდრე ფალავანდიშვილს კი სჯერა, რომ ფილმ And Then We Danced-ის ჩვენებით ხდებოდა შეტევა ვაჟკაცობაზე, ახლა კი "მსოფლიო ლობი" დედის ინსტიტუტის შეურაცხყოფას ცდილობს.

ჰომოფობიური პროტესტი And Then We Dance-ის წინააღმდეგ

8-9-10 ნოემბერს თბილისსა და ბათუმში ქართულ-შვედური ფილმის And Then We Danced-ის ქართული პრემიერის პარალელურად აქციები გაიმართა. თბილისში აქციის ორგანიზატორები ლევან ვასაძე, ქართული მარშის ლიდერი სანდრო ბრეგაძე და ჰომოფობიური დაჯგუფების წარმომადგენლები გურამ ფალავანდიშვილი და დიმიტრი ლორთქიფანიძე იყვნენ. ისინი სეანსების ჩაშლას ცდილობდნენ.

აგრესიული ჯგუფები მშვიდობიანი მოქალაქეებსა და სამართალდამცავებს პიროტექნიკას და სხვადასხვა ნივთს ისროდნენ, შემდეგ კი პარაკლისი გადაიხადეს. რაც შეეხება ბათუმში გამართულ ჩვენებას, კინოთეატრ აპოლოში დემონსტრანტებმა კვერცხები და შუშხუნები შეყარეს.

პოლიციისა და სპეცრაზმის მობილიზების მიუხედავად, აგრესიული პირების თავდასხმის გამო, თბილისში აქციაზე დაშავდნენ ანა სუბელიანი, დავით ბერძენიშვილი და ერთი პოლიციელი.

მიუხედავად პროტესტისა ჩვენება ყველა კინოთეატრში დაგეგმილ დროს დაიწყო და არცერთი სეანსი არ ჩაშლილა.

ფილმის პრემიერა კანის კინოფესტივალზე 16 მაისს შედგა, პირველი ქართული სასიყვარულო გეი დრამის ჩვენება კი თბილისის კინოთეატრებში 8-10 ნოემბერს იმართება. And Then We Danced ახალგაზრდა მოცეკვავის, მერაბის ცხოვრების შესახებ გვიყვება, რომელიც რადიკალურად იცვლება, მას შემდეგ, რაც მას ამბიციური მეტოქე შეუყვარდება.

და ჩვენ ვიცეკვეთ, რომელმაც არაერთი საერთაშორისო ჯილდო მოიპოვა, ამერიკის კინოაკადემიის დაჯილდოვების 92-ე ცერემონიალზე, საერთაშორისო სრულმეტრაჟიანი ფილმის (იგივე უცხოენოვანი ფილმის) კატეგორიაში შვედეთის სახელითაა გაგზავნილი. მისი რეჟისორი ლევან აკინია, რომელიც წარმოშობით საქართველოდანაა.