აქტივისტმა, გიგა მაქარაშვილმა გორის საპატიმრო დაწესებულება დატოვა. ის 18 ნოემბერს პარლამენტის პიკეტის დაშლისას დააკავეს და მოსამართლე, ვალერიან ფილიშვილმა 12-დღიანი პატიმრობა შეუფარდა. მისი პატიმრობის ვადა რამდენიმე წუთის წინ ამოიწურა.

აქტივისტები და მხარდამჭერები მაქარაშვილს საქართველოს ჰიმნითა და სიმღერით "თავისუფლება ლომთა ხვედრია" დახვდნენ.

ფოტო: გიგა მაქარაშვილი

მაქარაშვილმა განაცხადა, რომ ის "დასვენებულია" და პირდაპირ აქციაზე აპირებს წასვლას, რომ დაღლილ თანამებრძოლებს ჩაენაცვლოს.

18 ნოემბერს სპეცნაზმმა აქციის დაშლა და კარვების აყრა დაიწყო. სამართალდამცავებმა დემონსტრანტების წინააღმდეგ წყლის ჭავლი გამოიყენეს. ამის შემდეგ ქართული ოცნების დეპუტატები პარლამენტში შევიდნენ და ბიუროს სხდომა გამართეს.

აქციის დაშლისას 37 ადამიანი დააკავეს. მოსამართლე ვალერიან ფილიშვილმა დაკავებულებიდან 10 პირს, მათ შორის გიგა მაქარაშვილს, ზუკა ბერძენიშვილსა და ბექა ბასილაიას მოსამართლემ პატიმრობა შეუფარდა. გარდა ამისა, ერთ შენიშვნა დაეკისრა, ხოლო კიდევ ერთს 1 000-ლარიანი ჯარიმა. დანარჩენი 25 ადამიანი საქმე კი მოსამართლის მოუცლელობის გამო იმ დღეს გადაიდო.

აქციები თბილისის ქუჩებში მას შემდეგ განახლდა, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა — პროპორციული არჩევნები გერმანული მოდელით. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში. მმართველი გუნდი კი წინააღმდეგია და მას არაკონსტიტუციურს უწოდებს.