ოპოზიციასთან და დიპლომატიურ კორპუსთან შეხვედრის შემდეგ იუსტიციის მინისტრმა, თეა წულუკიანმა განაცხადა, რომ მათი პოზიცია ე.წ. გერმანული მოდელის არაკონსტიტუციურობის შესახებ ურყევად დარჩა.

"ამაზე მომდევნო დებატები ვეღარ გაიმართება. სხვა შემოთავაზებები გაჟღერდა უცხოელი კოლეგებისგან და თუ ეს შემოთავაზებები დარჩება ძალაში, ქართული ოცნება ის ძალაა, რომლისთვისაც მთავარი ქვეყანაა და რა თქმა უნდა, მზად არის დიალოგისთვის. მაგრამ, ჩვენი პოზიცია ურყევია, რომ საკონსტიტუციო ცვლილებები ვერ განხორციელდება", — განაცხადა წულუკიანმა ჟურნალისტებთან.

დიპლომატიური კორპუსის ჩართულობისა და საერთო შეხვედრის მიუხედავად, მმართველი გუნდი ოპოზიციას ე.წ. გერმანულ მოდელზე მაინც არ დათანხმდა. წულუკიანმა თქვა, რომ ოპოზიციამ ვერ წარადგინა ვერანაირი არგუმენტი იმისა, რომ ეს მოდელი კონსტიტუციურია.

მოლაპარაკებას, რომ ორივე მხარისთვის მისაღები შედეგი არ ექნებოდა ცხდაყოფდა ის განცხადებებიც, რომლებიც პოლიტიკოსებმა შესვლის წინ გააკეთეს. მაგალითად, ირაკლი კობახიძემ მისივე გუნდის ორგანიზებული შეხვედრის წინ განაცხადა, რომ ოპოზიციისთვის არაფრის შეთავაზების ინტერესი არ ჰქონდათ იმის გარდა, რომ მათთვის ქუჩაში დარჩენა ერჩიათ.

"პოლიტიკურად ჩვენ ეს უფრო მეტად გვაწყობს, თუ ისინი ქუჩაში დარჩებიან, იმიტომ, რომ განიცდიან ყოველდღიურ რეგრესს ამ შეთხვევაში", — აღნიშნა მან.

პარლამენტის თავმჯდომარე არჩილ თალაკვაძე კი აცხადებდა, რომ დღეს გამოჩნდებოდა რა არის შესაძლებელი მომავალში, თუმცა "ნებისმიერ შემთხვევაში" ის 2020 წლის არჩევნებისთვის მზადების აუცილებლობას უსვამდა ხაზს.

ორივე მათგანმა ხაზი გაუსვა იმ ფაქტს, რომ შეხვედრა არა მათი სურვილით, არამედ დიპლომატიური კორპუსისადმი "ანგარიშის გაწევის გამო" ჩანიშნეს. მმართველი პარტიის დეპუტატების მსგავსი პოზიციის პარალელურად, დიპლომატიური კორპუსს იმედი ჰქონდა, რომ მოლაპარაკება შედეგიანი იქნებოდა.

ამერიკის შეერთებული შტატების ელჩის მოვალეობის შემსრულებელმა, ელიზაბეთ რუდმა შეხვედრის წინ განაცხადა, რომ "ეს დიალოგი იქნება შესაძლებლობებისა და გადაწყვეტილების მოძებნა, ვიდრე რაიმე ვარიანტის გამორიცხვა". მანვე გამოთქვა იმედი, რომ შეხვედრის მონაწილეები "გამოავლენენ საკუთარ ერთგულებას საქართველოს დემოკრატიული განვითარებისა ევროატლანტიკური ინტეგრაციისკენ".

ოცნების შეხვედრა ოპოზიციის ნაწილთან და ე.წ. გერმანული მოდელი

სასტუმრო ბილტმორში ქართული ოცნების შეხვედრა ოპოზიციასთან და დიპლომატიურ კორპუსთან დახურულ კარს მიღმა თითქმის შვიდი საათი მიმდინარეობდა.შეხვედრას ოპოზიცისა და სამოქალაქო საზოგადოების გაერთიანებიდან მხოლოდ ნაციონალური მოძრაობისა და ევროპული საქართველოს წევრები; ასევე, პარლამენტის ყოფილი თავმჯდომარეები, დავით უსუფაშვილი, ნინო ბურჯანაძე, აკაკი ასათიანი და ირაკლი კობახიძე ესწრებიან. შეხვედრაზე მიწვეულია პატრიოტთა ალიანსიც, რომელიც პროტესტის მოთხოვნებს იზიარებდა, მაგრამ ოპოზიციის აქციებს არ უერთდებოდა და საკუთარს მართავდა. მმართველმა გუნდმა შეხვედრაზე არ მიიწვია სამოქალაქო მოძრაობები.

შეხვედრის იდეა ქართულმა ოცნებამ მას შემდეგ გამოთქვა, რაც ამისკენ დიპლომატიურმა კორპუსმა მოუწოდა.

პროპორციული სისტემის კანონპროექტის ჩაგდების შემდეგ მოძრაობა სირცხვილიამ ხელისუფლებას ე.წ. გერმანული მოდელი შესთვაზა, რასაც ოპოზიციური პარტიები და სხვა სამოქალაქო მოძრაობები დათანხმდნენ. ვინაიდან კანონპროექტის ჩაგდების მიზეზად მაჟორიტარი დეპუტატების უკმაყოფილება დასახელდა, პროტესტის მონაწილეებმა განაცხადეს, რომ ეს მოდელი მათ პარლამენტში მოხვედრასაც ითვალისწინებდა.

კერძოდ, მოდელის მიხედვით, პარლამენტში ადგილები არჩევნებზე მიღებული ხმების შესაბამისად განაწილდება. მისი საშუალებით, გამარჯვებული მაჟორიტარები იღებენ მანდატებს და შემდგომ მათ პარტიული სიიდან ემატებათ იმდენი დეპუტატი, რამდენიც მათ პროპორციის შესაბამისად ეკუთვნით.

• რას ნიშნავს გერმანული მოდელი საქართველოსთვის

მმართველი გუნდი შეთავაზებას არ დათანხმდა. ქართული ოცნების გენერალური მდივანი კახა კალაძე აცხადებდა, რომ თემა დახურულია და ისინი სხვა ფორმატზე აღარ იმსჯელებენ.

ნოემბრის მოვლენები — მოკლედ

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.