დღეს, ბიბლიოთეკასთან მიმდინარე აქციაზე დაკავებული ლაშა ჩხარტიშვილი მოსამართლე ვალერიან ფილიშვილმა სასამართლოს შეურაცხყოფისთვის 300 ლარით დააჯარიმა და სხდომის დარბაზიდან გააძევა. ამის შესახებ ინფორმაციას პირველი არხი ავრცელებს.

პირველი არხის ინფორმაციით, ლეიბორისტული პარტიის წევრმა ლაშა ჩხარტიშვილმა მოსამართლის აცილება მოითხოვა. მისი თქმით, ვალერიან ფილიშვილი მიკერძოებულია და საპროტესტო აქციის წარმომადგენლების მიმართ მიკერძოებულ გადაწყვეტილებებს იღებს.

მოსამართლემ მას უთხრა, რომ ის იღებს კანონიერ გადაწყვეტილებებს, რასაც ჩხარტიშვილი არ დაეთანხმა. ვალერიან ფილიშვილმა ის გააფრთხილა, რომ მიეცა მისთვის პოზიციის დაფიქსირების საშუალება. საბოლოოდ, მოსამართლემ ის დააჯარიმა და დარბაზიდან გააძევა.

საქმეზე სხდომა 19:00 საათამდე გადაიდო.

ლეიბორისტული პარტიის წევრი ერთ-ერთია იმ ექვსს ადამიანს შორის, რომლეიც დღეს გამართულ აქციაზე დააკავეს. ლაშა ჩხარტიშვილს ბრალი ადმინისტრაციული სამართალდარღვევათა კოდექსის 166-ე და 173-ე მუხლებით აქვს წარდგენილი, რაც წვრილმან ხულიგნობასა და პოლიციელის მოთხოვნის დაუმორჩილებლობას გულისხმობს.

დღეს, 29 ნოემბერს პარლამენტთან აქცია განახლდა, თუმცა, ქართული ოცნების დეპუტატები შენობაში მანამდე შევიდნენ, სანამ პიკეტი დაიწყებოდა. მოგვიანებით, აქციის მონაწილეებმა პარლამენტის ეროვნულ ბიბლიოთეკასთან გადაინაცვლეს. მათთვის ცნობილი გახდა, რომ თეა წულუკიანი იქ შეხვედრაზე მიდიოდა. მათი თქმით, ყველგან და ყოველთვის შეუქმნიან დისკომფორტს ქართული ოცნების წევრებს. ბიბლიოთეკასთან პოლიციაა მობილიზებული.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.