ზვიად კუპრავამ მხარდამჭერებთან ერთად შინაგან საქმეთა სამინისტროს სიმბოლური ბოქლომი დაადო.

"ეს არის სიმბოლური აქტი იმ უკანონობის გამო, რასაც ჩადის შსს, განსაკუთრებით ბოლო წლების განმავლობაში", — განაცხადა კუპრავამ მთავარ არხთან საუბრისას.

გარდა ამისა, კუპრავამ და მისმა მხარდამჭერებმა შსს-ში "რუსთაველის გამზირიდან ნივთმტკიცებად ამოღებული შეშის" ჩაბარება სცადეს განცხადებასთან ერთად, რომ დაწყებულიყო გამოძიება. თუმცა, მათ ამის საშუალება არ მისცეს.

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა. აქციის დაშლის შემდეგ დააკავეს 37 აქტივისტი, მათ ნაწილს ადმინისტრაციული პატიმრობა შეუფარდეს.

ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია, პრეზიდენტის ადმინისტრაცია და მმართველი პარტიის დეპუტატების ოფისები და ოლქები.