ზვიად კუპრავა მხარდამჭერებთან და საპროტესტო აქციის მონაწილეებთან ერთად შინაგან საქმეთა სამინისტროსთან მივიდა, რომ "რუსთველზე ამოღებული ნივთმტკიცება — შეშა" ჩააბაროს.

"შეშა მოვიტანეთ განცხადებასთან ერთდ, რომ ის ნაპოვნია რუსთაველის მიმდებარე ტერიტორიაზე და ვთხოვთ მათ დაიწყონ გამოძება, რომ ის არ იყოს გამოყენებული რაიმე საშიში აქტისთვის, როგორიც არის ადამიანის გათბობა", — განაცხადა ერთ-ერთმა აქტივისტმა მთაავარ არხთან საუბრისას.

პოლიციამ მათ შენობაში შესვლის უფლება არ მისცა და მოუწოდა, რომ შეშა გარეთ დატოვონ. აქტივისტები უხსნიდნენ, რომ ეს არის ნივთმტკიცება და მას ვერ დატოვებენ, თუმცა პოლიციას აზრი არ შეუცვლია.

"თქვენ არაერთგზის მობრძანებულხართ, დატივოებიათ განცხადება. შესაბამისად, ახლაც შებრძანდით, დატოვეთ შეშა გარეთ. ეს არ არის სივრცე, სადაც მოაწყობთ მასკარადს", — უთხრა კუპრავას ერთ-ერთმა პირმა, რომელიც ჟურნალისტებს დაცვის თანამშრომლის წარმომადგენლად გაეცნო.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.