პარლამენტის ყოფილი თავმჯდომარე ირაკლი კობახიძე ამბობს, რომ ქვეყნისთვის "საუკეთესო გამოსავალი" იქნება, თუ შემდეგ პარლამენტში ნაციონალური მოძრაობის არცერთი წარმომადგენელი არ იქნება. ასე გამოეხმაურა ის ოპოზიციის ბოიკოტს პარლამენტში პლენარულ სხდომის ჩატარებასთან დაკავშირებით. მისივე თქმით, "მათ ადგილებს კონსტრუქციული ოპოზიციისა და ისეთი პოლიტიკური ძალის წარმომადგენლები დაიკავებენ, რომლებსაც ქვეყანა და ეკლესია უყვართ."

როგორც კობახიძემ განაცხადა, კონსტრუქციულ პოლიტიკურ ოპოზიციას თავად ვერ შეიქმნიან. თუმცა, განმარტა, რომ როგორც კი ორპარტიული რეჟიმი დაიმსხვრევა, ეროვნულ ღირებულებებზე დაფუძნებული პოლიტიკური ძალებისთვის სივრცე გათავისუფლდება.

"მაშინვე გაჩნდება სივრცე აბსოლუტურად კონსტრუქციული პოლიტიკური ძალებისთვის. ისეთი პოლიტიკური ძალებისთვის, რომლებიც ეფუძნებიან თან ეროვნულ და თან დასავლურ ღირებულებებს. დღეს გვაქვს კრიზისი ოპოზიციაში და მე მგონია, რომ ეს კრიზისიც დაძლევადია. მთავარია, ოპოზიციამ მოინდომოს", — განაცხადა ირაკლი კობახიძემ.

პოლიტიკური ძალებისათვის, რომ ეკლესიისადმი კეთილგანწყობა მნიშვნელოვანია, პოზიციის წარმომადგენლების გარდა, ოპოზიციის წევრებიც აცხადებენ. რამდენიმე კვირის წინ, საქართველოს ყოფილი პრეზიდენტი მიხეილ სააკაშვილის აცხადებდა, რომ მას ყოფილ თანაგუნდელთან და ევროპული საქართველოს ლიდერ გიგა ბოკერიასთან ფუნდამენტური განსხვავება აქვს, რადგან ჯვარს ატარებს. ასევე ამბობდა,რომ გიგა ბოკერია "ტრადიციული, ქართული, ქრისტიანული ფასეულობებისაგან დისტანცირებულია."