სალობიე ბიას მფლობელი და შეფ-მზარეული, გიორგი იოსავა პარლამენტთან საპროტესტო აქციაზე გამოსულ მოქალაქეებს მხარდაჭერას უცხადებს. იოსავა იმ სალობიეს მფლობელია, სადაც რამდენიმე საათის წინ აქციის პარალელურად პრეზიდენტი იყო მისული.

"გავედი თუ არა ქალაქიდან, ჩემ სალობიე ბიას ესტუმრა სალომე "ბუა"... სრული სოლიდარობა აქციის მონაწილეებს", — წერს გიორგი იოსავა Facebook-ზე.

ზუსტად იმ დროს, როცა პრეზიდენტი სალობიეში იყო, თბილისში აქცია იმართებოდა. ზურაბიშვილს პოლიციის კორდონის გავლით მოუწია სალობიეს დატოვება.

აქციის მონაწილეები აპროტესტებენ ბიძინა ივანიშვილის დაპირების შეუსრულებლად დატოვებას და 2020 წლის არჩევნების პროპორციული სისტემაზე გადასვლის ჩაგდებას.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კაცელარია, პროკურატურა და პრეზიდენტის რეზიდენცია.