ქართული ოცნების მაჟორიტარი დეპუტატი, კობა ლურსმანაშვილი ამბობს, რომ არსებული შერეული საარჩევნო სისტემა დარჩება 2020 წლისთვის და მას აზრის შესაცვლელად "გიგი უგულავას გაშლილი ხელები ვერ შეაშინებს". ამის შესახებ მან დღეს, 25 ნოემბერს პარლამენტში შესვლისას მედიასთან ისაუბრა:

"უმრავლესობა აცხადებს, რომ პროპორციულზე გადასვლის, ან გერმანული სისტემის რესურსი აღარ არსებობს, რომ ისე დავაინიციროთ.... პირადად მე არ ვუჭერ მხარს პროპორციულ სისტემაზე გადასვლას და ეს გამოვხატე კენჭისყრაზე და რა მოხდება? შემაშინებს გიგი უგულავას გაშლილი ხელები და მკაცრი მოწოდება თუ დავით ბაქრაძის რეიტინგულობა? არცერთი მაშინებს, მოვიდნენ და იყარონ კენჭი ჩემთან ერთად"

სრულად მაჟორიტარულ სისტემაზე გადასვლის გეგმაზე კობა ლურსმანაშვილმა თქვა, რომ ბიძინა ივანიშვილი არ უკრძალავთ მათ, ჰქონდეთ თავიანთი ინიციატივები.

საქართველოს კონსტიტუციით, 2024 წლიდან საპარლამენტო არჩევნები სრულად პროპორციული საარჩევნო სისტემით უნდა ჩატარდეს.

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა. აქციის დაშლის შემდეგ დააკავეს 37 აქტივისტი, მათ ნაწილს ადმინისტრაციული პატიმრობა შეუფარდეს.

ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია, პრეზიდენტის ადმინისტრაცია და მმართველი პარტიის დეპუტატების ოფისები და ოლქები.

პროპორციულ სისტემაზე გადასვლის პირობა ბიძინა ივანიშვილმა დადო, როდესაც 20-21 ივნისს განვითარებული მოვლენების გამო პროტესტი დაიწყო. პროპორციული სისტემა აქცია #სირცხვილიას მთავარი მოთხოვნა იყო.