გირჩი მიიჩნევს, რომ ქართული ოცნებისა და ბიძინა ივანიშვილის დასამარცხებლად აუცილებელია ორპუნქტიანი გეგმის შესრულება. პარტიის აზრით, ამისთვის უნდა არსებობდეს პრინციპული ოპოზიცია და საკუთრების რეფორმა გატარდეს.

პრინციპული ოპოზიცია

პარტიის აზრით, ქართული ოცნების დასამარცხებლად გაერთიანებულ თანამებრძოლებს ერთმანეთის არ უნდა ეშინოდეთ. მაგალითად კი ნაციონალური მოძრაობა და მიხეილ სააკაშვილი მოჰყავთ.

"ამ ხალხის წუხილი არის სწორი, სამართლიანი და თუ მოგება გვინდა, ეს წუხილი უნდა მოიხსნას. სამართალდამცავი და მართლმსაჯულების სისტემის გარეშე, ნაციონალური მოძრაობა საშიში არ არის, უფრო მეტიც, რეფორმატორია", — ვკითხულობთ პარტიის განცხადებაში.

მათივე განმარტებით, ხალხი უნდა დარწმუნდეს იმაში, რომ ნაციონალური მოძრაობა რაიმეს "ზრდილობის გამო არ ამბობს" და ამომრჩეველი დაარწმუნონ, რომ მომავალში მათგან "საფრთხე არ მოდის".

საკუთრების რეფორმაა

პარტია აღნიშნავს, რომ თუ მმართველ პარტიას ერთ ამომრჩევლის მოსყიდვა ათასი ლარი დაუჯდება, არჩევნების მოსაგებად მილიარდი ლარი საკმარისი იქნება. ეს თანხა კი ბიძინა ივანიშვილის ქონების 6 პროცენტია.

გირჩში მიაჩნიათ, რომ გარდა ამისა, ივანიშვილის დასამარცხებლად აუცილებელია საზოგადოება დარწმუნდეს, რომ მდიდრები არიან. პარტიის ხედვით, საზოგადოების გასამდიდრებლად აუცილებელია, სახელმწიფოს საკუთრებაში არსებული ქონება საზოგადოებაზე გადანაწილდეს.

"თუ ჩვენ ამ ქონების განაწილების სამართლიან სქემაზე შევთანხმდით, ამ ქონების ღირებულება 10-ჯერ და მეტჯერ აღემატება ივანიშვილის მთელ ქონებას", — განმარტავს პარტია.

გირჩში აცხადებენ, რომ თუ ოპოზიციას საკონსტიტუციო უმრავლესობა ექნება, საკუთრების ფუნდამეტური რეფორმა შესაძლებელი იქნება.