სახელმწიფო უსაფრთხოების სამსახური სამოქალაქო აქტივისტებისა და ოპოზიციის პასუხად აცხადებს, რომ აქციებზე მათი თანამშრომლების ყოფნა კანონდარღვევა არ არის. გავრცელებულ განცხადებაში უწყება არ უარყოფს გაჟღერებულ ინფორმაციას იმაზე, რომ მათი თანამშრომლები აქციებზე ფოტო-ვიდეოს იღებდნენ და კანონის იმ მუხლებს ასახელებს, რომელიც მათ ასე მუშაობის უფლებას აძლევს.

სუს-ის განცხადებით, "მოსალოდნელი საფრთხეებისა და რისკების თავიდან ასაცილებლად" ისინი ახორციელებენ ოპერატიულ-სამძებრო ღონისძიებებს, აგრეთვე საგამოძიებო მოქმედებებს, რომელიც კანონით რეგულირდება. მათივე თქმით, ამ და სხვა ნორმატიული აქტებით თანამშრომლები იყენებენ "ოპერატიულ-ტექნიკურ საშუალებებს".

უწყებაში განმარტავენ იმასაც, რომ მათი თანამშრომლები ადამიანის ძირითადი უფლებებისა და თავისუფლებების დაცვისა და პატივისცემის, დისკრიმინაციის დაუშვებლობისა და პოლიტიკური ნეიტრალობის პრინციპებით მოქმედებენ.

გარდა ამისა, სუს-ში აცხადებენ, რომ აქტივისტებსა და ოპოზიციას არცერთხელ არ წარუდგენიათ იმის მტკიცებულება, რომ აქციაზე მყოფი პირები მათი თანამშრომლები არიან.

საპროტესტო აქციები ორგანიზატორები ხშირად აღნიშნავენ იმ ფაქტს, რომ სახელმწიფო უსაფრთხოების სამსახურის წევრები მათ ფოტო-ვიდეოს უღებენ. ისინი მოუწოდებდნენ უწყებას, სხვა პრობლემებისთვის მიექცია ყურადღება და დრო მათზე არ დაეკარგა.