შემცირებული სატელევიზიო რეიტინგისა და გაზრდილი კრიტიკის ფონზე თეთრეულის ბრენდი Victoria's Secret თავის ყოველწლიურ მასშტაბურ შოუს აუქმებს. ამის შესახებ ჭორები ჯერ კიდევ ზაფხულში გავრცელდა, თუმცა ბრენდმა ახლა ეს ოფიციალურად დაადასტურა.

ბრენდმა შოუების გაკეთება 1995 წლიდან დაიწყო. ის პოპ-კულტურის ერთ-ერთ მნიშვნელოვან ღონისძიებად იქცა და ყოველწლიურად ტელევიზორებთან მილიონობით მაყურებელს აგროვებდა. წინა წლის შოუს ისტორიაში ყველაზე დაბალი რეიტინგი ჰქონდა. მას ტელევიზიიით მხოლოდ 3,3 მილიონმა ადამიანმა უყურა. გარდა ამისა, კრიტიკოსებმა მას სექსისტური, მოძველებული და ერთფეროვანი უწოდეს.

ბრენდის მფლობელი კომპანია L Brands აცხადებს, რომ მარკეტინგულ სტრატეგიას გადახედავს და სამომავლოდ ბევრ სიახლეს შემოგვთავაზებს.

Victoria's Secret-ის შოუები გამოირჩეოდა თავისი პომპეზურობით, ბრჭყვიალა კოსტიუმებით, ფრთებითა და ანგელოზებით, რომლებიც ხშირად მსოფლიო დონის მოდელები იყვნენ.

თუმცა დროთა განმავლობაში შოუების მიმართ დამოკიდებულება შეიცვალა, რაც აისახა როგორც რეიტინგებში, ისე გაყიდვებში. L Brands-მა ამ წლის მესამე კვარტალში 252 მილიონი დოლარი დაკარგა.

ამასთანავე, ბრენდის ყოფილი გენერალური დირექტორი, ედ რაზეკი კრიტიკის ქარ-ცეცხლში გაეხვა Vogue-ისთვის მიცემული ინტერვიუს გამო, რომელშიც განაცხადა, რომ შოუში ტრანსგენდერი მოდელები არ უნდა იყვნენ. მოგვიანებით მან კომენტარისთვის ბოდიში მოიხადა და წლის დასაწყისში კომპანია დატოვა.