დემოკრატიული მოძრაობა - ერთიანი საქართველო ცესკოს იმ დადგენილებას აპროტესტებს, რომლის თანახმადაც არჩევნების მეორე ტურს მხოლოდ მხოლოდ იმ პარტიების დამკვირვებლები დააკვირდებიან, რომელთა კანდიდატებიც მეორე ტურში მონაწილეობენ. შესაბამისად, ეს პარტიებია: ქართული ოცნება, ერთიანი ნაციონალური მოძრაობა, თავისუფალი დემოკრატები და მრეწველები.

დემოკრატიული მოძრაობის წარმომადგენელი, ირაკლი ჭყოიძე ამბობს, რომ აღნიშნული გადაწყვეტილება ცესკომ 9 ხმით მიიღო და ამით საარჩევნო სუბიექტების უფლებები დაარღვია:

"ჩვენი კანონმდებლობით, საქართველოს პარლამენტის არჩევნები არის ერთიანი პროცესი, დანიშვნის დღიდან საბოლოო, შემაჯამებელ ოქმამდე. მათ შორის მაჟორიტარული და პროპორციული წესით ჩატარებისას. ეს არის ერთიანი პროცესი. მიუხედავად იმისა, რომ რომელიღაც პოლიტიკურმა სუბიექტმა ვერ გაიყვანა თავისი კანდიდატი, ეს იმას არ ნიშნავს, რომ მას თუნდაც პოლიტიკური უფლება წაერთვას, დააკვირდეს პროცესებს, დააფიქსიროს დარღვევები".