ქართული ოცნების მაჟორიტარ დეპუტატს, კახა ოქრიაშვილს ჰგონია, რომ მოსახლების უმრავლესობამ არ იცის მაჟორიტარული და პროპორციული არჩევნების ნაკლი და უპირატესობა. ამის შესახებ ოქრიაშვილმა ჟურნალისტებს პარლამენტში უთხრა, რომლის გარეთაც რამდენიმე დღეა პროპორციული წესით არჩევნების ჩატარების მოთხოვნით აქცია იმართება.

"დღეს რომ გამოვიკვლიოთ ჩვენს მოსახლეობაში, რა არის კარგი მაჟორიტარულ სისტემაში, რა არის ცუდი, აგრეთვე პროპორციულში, 99 პროცენტი ვერ გვიპასუხებს. იმიტომ, რომ ვერ ერკვევა", — თქვა

მისი თქმით, "ზუსტად იცის, რა იცის ხალხმა და რა — არა" და გამოსავალი საზოგადოების ინფორმირებაა.

ჟურნალისტის დამაზუსტებელ კითხვაზე, მის გუნდშიც არიან თუ არა, ვინც არ იცის მაჟორიტარულ და პროპორციულ სისტემას შორის განსხვავება, დეპუტატი ასე პასუხობს:

"დებილები ყველგან არიან, ჟურნალისტიც ბევრი მინახავს. ასე რომ, პროვოკაციულ კითხვებს თავი დაანებე".

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

სპეცრაზმმა აქცია დაშალა და პიკეტი მოხსნა პარლამენტის შესასვლელებს. აქციის დაშლისას მინიმუმ 18 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.