ქართული ოცნების მაჟორიტარი დეპუტატი საკონსტიტუციო ცვლილების ჩავარდნის შემდეგ განვითარებულ მოვლენებზე ამბობს, რომ ჯობია მოკლევადიანი რყევები, ვიდრე გრძელვადიანი არასტაბილურობა:

"აქციები რომ იქნებოდა და უმრავლესობაშიც იქნებოდა რყევები, რა თქმა უნდა, ჩვენ ეს ვიცოდით".

დეპუტატის თქმით, მოქალაქეებს რაც არ უნდა არ სიამოვნებდეთ პოზიცია, მაინც პატივი უნდა სცენ მას:

"იქ არის ბევრი ცუდად და საზოგადოებისთვის საზიანოდ ამოცნობადი სახე, რა თქმა უნდა, იქ არიან გულწრფელი ადამიანებიც. პატივს ვცემ პროტესტს, მაგრამ პოლიტიკა წყდება პარლამენტში".

მაჟორიტარმა დეპუტატმა დიმიტრი ხუნდაძემ მხარი არ დაუჭირა პროპორციულ საარჩევნო სისტემაზე გადასვლას. კენჭისყრის შემდეგ მან საზოგადოებას პარლამენტის გადაწყვეტილება მიულოცა.

ელჩის განცხადების შემდეგ ბიძინა ივანიშვილის დაპირება არ შესრულდა. ქართულმა ოცნებამ მხარი არ დაუჭირა კანონპროექტს, რომლითაც ქვეყანაში 2020 წლის არჩევნები სრულად პროპორციული სისტემით უნდა ჩატარებულიყო. სწორედ ამ მიზეზის გამო რამდენიმე ათასი ადამიანი რუსთაველის გამზირზე შეიკრიბა.