ქართული ოცნების უკვე ყოფილი დეპუტატი, ზაზა ხუციშვილი ამბობს, რომ როდესაც პრინციპულ საკითხებზე არის აზრთა სხვადასხვაობა, მისთვის რთული იქნებოდა გუნდში მუშაობა. მისივე თქმით, თანაგუნდელების პოზიციის ცვლილება მისთვის მოულოდნელი იყო.

"ორი თუ სამი თვის დაინიცირებული კანონპროექტი, რომელსაც ამდენი ხელმომწერი ჰყავდა და გუშინ დარბაზში ვიგებ, რომ ამდენი მოწინააღმდეგე ჰყავს, ესეც გუნდურობასთან არანაირ კავშირში არაა", — აღნიშნა ხუციშვილმა.

დიმიტრი ცქიტიშვილმა, თამარ ჩუგოშვილმა, თამარ ხულორდავამ, სოფო ქაცარავამ, გიორგი მოსიძემ, ირინა ფრუიძემ და ზაზა ხუციშვილმა საპარლამენტო უმრავლესობა, ქართული ოცნება და თანამდებობები დატოვეს.

"მე იმედი მაქვს, რომ მმართველი ძალა ისე წარმართავს ქვეყანას, რომ ქვეყნისთვის მძიმე პროცესებში არ გადაიზარდოს. არაფერს არ შევუწყობ ხელს, რაც იქნება ქვეყნის კრიზისში შემყვანი", — თქვა ჩუგოშვილმა.

პარლამენტმა პროპორციულ საარჩევნო სისტემაზე გადასვლის კანონპროექტი ჩააგდო. 101 მომხრე, 3 წინააღმდეგი, კანონპროექტის მისაღებას 113 ხმა იყო საჭირო.