პარლამენტის უმრავლესობის ლიდერის, გია ვოლსკის თქმით, ქართული ოცნების ოფისთან შეკრებილი აქტივისტების სტვენამ დაბულინგების სახე მიიღო. მოძრაობა ქვეყნის სამსახურში აქციას ატარებს ქართული ოცნების ოფისთან, სადაც უმრავლესობა პროპორციულ საარჩევნო სისტემაზე გადასვლას განიხილავდა.

სხდომის დატოვების შემდეგ ვოლსკიმ განაცხადა, რომ პარლამენტში პროექტთან დაკავშირებით თავისუფალი კენჭისყრა იქნება. გარდა ამისა, მას იმედი ჰქონდა, რომ დღევანდელი სხდომა მალე დასრულდებოდა:

"ამასთან დაკავშირებით, რაც ახლა ხდება, სასტვენებით რომ დგას ხალხი, ამან კიდევ დაბულინგების სახე მიიღო და ზოგიერთის გაღიზიანება გამოიწვია".

თავისუფალი კენჭისყრა გულისხმობს, რომ ყველა დეპუტატი დამოუკიდებლად მიიღებს კენჭისყრაში მონაწილეობას და არ გაითვალისწინებს პარტიის პოზიციას.

დღეს მესამე დღეა, რაც პარლამენტი ცდილობს არჩევნების პროპორციული სისტემით ჩატარების კონსტიტუციური ცვლილება მიიღოს. ამისთვის მინიმუმ 113 ხმა არის საჭირო, თუმცა ქართული ოცნების წევრების ერთი ნაწილი წინააღმდეგია.

პროპორციულ სისტემაზე გადასვლის დაპირება მმართველი პარტიის დამფუძნებელმა, ბიძინა ივანიშვილმა 20 ივნისს დაწყებული რამდენიმეათასიანი აქციების შემდეგ გასცა. მისი თქმით, 2020 წლის არჩევნებზე იქნებოდა ნულოვანი ბარიერი.