აჭარის მთავრობა ბათუმში, "მუყაოს" ე.წ. ოცნების ქალაქში კორპუსების ასაშენებლად 41 მილიონი ლარის სატენდერო დოკუმენტაციის გამოცხადებას გეგმავს. ამის შესახებ აჭარის მთავრობის თავმჯდომარემ, თორნიკე რიჟვაძემ დღეს, 11 ნოემბერს ბრიფინგი გამართა.

აჭარის მთავრობაში აცხადებენ, რომ უკვე მომზადებულია მშენებლობის პროექტი, ასევე, პროექტს გავლილი აქვს ოთხი ექსპერტიზა. პროექტის ფარგლებში განხორციელდება დაახლოებით 54 ათასი მ²-ის მშენებლობა. შერჩეულ კომპანიას დაევალება, ხელშეკრულების დადებიდან 18 თვეში დაასრულოს მშენებლობა.

"მუყაოს ქალაქი" ხელვაჩაურში, 25-ე და 53-ე ბატალიონების ყოფილ ტერიტორიაზე 2012 წლის არჩევნების შემდეგ გაჩნდა. სახელდახელოდ აგებულ ფიცრულებში ათასობით ადამიანი შესახლდა. მათი ნაწილი ეკომიგრანტია. ტერიტორიის თვითნებურად დაკავების პროცესი წლების განმავლობაში გრძელდებოდა.