თბილისში ბინები ხანდახან ასტრონომიულ ფასს ურტყამს. ხშირად, რამდენიმე სართულიანი სახლი მილიონობით დოლარი ღირს.

ფასის მიუხედავად, ეს საცხოვრებლები ძირითადად, უგემოვნობის ეტალონია ხოლმე. მათი პროექტების, დიზაინის და ინტერიერის შეფასება საუკეთესოდ ალბათ ამ ვიდეოს გამოუვა.

უძრავი ქონების შესყიდვა შეიძლება გარკვეული ინვესტიციაც იყოს, მაგრამ თბილისში აშენებული სახლები მაინცდამაინც სტაბილურ დაბანდებად არ მიმაჩნია.

მართალია კარგია, როცა ფული ქვეყანაში ტრიალებს და რჩება, მაგრამ მე მაინც გირჩევთ, თქვენი ფული უბერ-ელიტურად დახარჯოთ და ბინას ვაკეში შატო საფრანგეთში ამჯობინოთ.

გთავაზობთ 10 საოცარ სახლს, რომელიც ჭავჭავაძეზე მდებარე ბინებზე იაფი ღირს:

1. შატო ზემო ნორმანდიაში: $423 020

მეცხრამეტე საუკუნის შატო, 13 საძინებლით, რომელიც თავის დროზე ტოტის კომუნის გრაფის რეზიდენცია იყო.

ბინა ვაკეში: $470 000
488 მ2, 8 ოთახი, ევრორემონტით, იტალიური ავეჯით და ვერსაჩეს კაფელით (ვაუ!).

2. სასახლე პიკარდიაში: $597 184

ქალაქ აბევილთან მდებარე შატო 5 საძინებლით, 6 ათასი მ² მიწის ნაკვეთით, ღვინის სარდაფითა და ბილიარდის ოთახით.

ბინა ჭავჭავაძეზე: $720 000
7 ოთახიანი, 540 მ2, მერვე სართული, თეთრი კარკასი, ავტოფარეხით, დამაფონითა და დაცვით.

3. შატო ბორდოში: $606 150

კოშკიანი და ექვს-საძინებლიანი პატარა სასახლე ბორდოსთან ახლოს (კომპლექტში მოყვება 800 მ² მიწის ნაკვეთი).

ბინა ჭავჭავაძეზე: $720 000
7 ოთახი, 525 მ², მეცხრამეტე სართული, გარაჟით და ლიფტით.

4. სასახლე პოიტუში: $667 146

9 საძინებლით, 1 610 მ² ბაღით და ეზოთი, ღვინის სარდაფით.

ბინა ჭავჭავაძეზე: $867 000
5 ოთახი, გათბობით, ცხელი წყლით, ევრორემონტით, ინტერნეტით, გაზით, დომოფონით, ლიფტით, სიგნალიზაციით და 3 აივნით

5. სასახლე ვიენეში: $732 801

14 საძინებლიანი სასახლე ვიენეში, სალოცავით, საცურაო აუზით, ბიბლიოთეკით და 1,4 ჰექტარი მიწის ნაკვეთით.

ბინა ჭავჭავაძეზე: $1 500 000 (უავეჯოდ) ან $1 700 000 (ავეჯით)
7 ოთახი, 700 მ2, ევრორემონტით, ავეჯით, ტექნიკით, ბუხრით, ინტერნეტით, დამაფონით, დაცვით და ა.შ.

6. შატო სამხრეთ პირინეებში: $737 037

მეცხრამეტე საუკუნის შატო 14 საძინებლით, აუზით და 3,25 ჰექტარი მიწის ნაკვეთით.

ბინა ჭავჭავაძეზე: $800 000
7 ოთახი, 600 მ², სიგნალიზაციით, დომოფონით, დაცვით და ლიფტი.

7. სასახლე დორდონში: $846 534

სასახლე 6 რეზიდენციით სენტ ესტიესთან, ღვინის სარდაფით და სავარჯიშო დარბაზით.

ბინა ორთაჭალაში: $1 000 000
10 ოთახი, 700 მ², სიგნალიზაციით, დომოფონით, ბუხრით და ავტოფარეხით.

8. შატო ნორმანდიაში: $893 764

8 საძინებლიანი, გალავან შემორტყმული ბაღით, 3,5 ჰექტარი მიწის ნაკვეთით და ღვინის მარნით.

ბინა ჭავჭავაძეზე: $1 000 000
500 მ², 8 ოთახი, ავეჯით, ტექნიკით, ბუხრით, ვერანდით და ავტოფარეხით.

9. სასახლე პიკარდიაში: $972 833

სასახლეს მოყვება: 9 საძინებელი, ღვინის სათავსო, კინო-თეატრი, ბიბლიოთეკა, საუნა, აუზი და გოლფის მოედანი.

ბინა ჭავჭავაძეზე: $1 400 000
6 ოთახი, 1000 მ², ბუხრით, დაცვით, გარაჟით, ლიფტით და დომოფონით.

10. სასახლე ლანგუდოკი-რუსოლინში: $1 256 000

მე-17 საუკუნის მიწურულს აშენებული ღვინის შატო, 8 საძინებლით, აუზით, ტერასული ბაღებით და ვენახით.

ბინა კრწანისში: $1 200 000
8 ოთახი, 2000 მ², გარაჟით.

როგორც ხედავთ, დაფიქრება ნამდვილად ღირს. ხოლო თუ მაინც გიძნელდებათ მზის და ვარდების მხარის მიტოვება, როდესაც ხელში მორიგი მილიონი ჩაგივარდებათ, იყიდეთ მერვე შატო ნორმანდიაში და მორჩენილი ხურდით — რამდენიმე "ხრუშოვკა" საბურთალოზე, საფრანგეთიდან ჩამოსეირნებისას ღამის გასათევად.