თუ ფილმებისა და სერიალების სანახავად ნეტფლიქსის მოხერხებული და კომფორტული პლატფორმა გიყვართ, მაშინ თქვენ თუ არა, თქვენ გარშემო აუცილებლად იქნება ისეთი ვინმე, ვისაც სხვისი ანგარიშის გაზიარება სრულიად უსასყიდლოდ უცდია.

ერთი შეხედვით, ამაში შესაშფოთებელი არაფერია: რა შავდება იმით, თუ მეგობარს, მეზობელს, კურსელს ან სხვა ქალაქში მცხოვრებ შეყვარებულს ჩვენი პაროლი გავუზიარეთ, რათა ნეტფლიქსზე მაღალი ხარისხითა და სასურველი სუბტიტრებით ნახონ საყვარელი სატელევიზიო შოუ.

თუმცა, თავად კომპანიისთვის ეს უწყინარი ქმედება საკმაოდ დიდი ზიანის მომტანია: 2018 წელს გამოქვეყნებული კვლევის თანახმად, პაროლების გაზიარების გამო ნეტფლიქსი ყოველთვიურად $135 მილიონს კარგავს, რაც წელიწადში $1,6 მილიარდიან ზარალს უდრის.

კვლევის შედეგად ისიც გაირკვა, რომ საკუთარი ანგარიშის პაროლს ნეტფლიქსის მომხმარებლების 10% უზიარებს სხვას, რაც დაახლოებით 13,7 მილიონ ადამიანს უდრის.

მიუხედავად იმისა, რომ ნეტფლიქსის შემოსავლები ყოველწლიურად მნიშვნელოვნად იზრდება - 2017 წელს $8.9 მილიარდიანი მაჩვენებელი 2018 წელს $12 მილიარდამდე გაიზარდა - ეს ზარალი მაინც შესამჩნევად აისახება კომპანიის ფინანსებზე.

ამ პრობლემის წინაშე არა მხოლოდ ნეტფლიქსი, არამედ კიდევ ისეთი დიდი კომპანიები არიან, როგორებიცაა Hulu, Amazon თუ HBO. ბოლო პერიოდში ეს გიგანტი კომპანიები სხვადასხვა საშუალებით აქტიურად მუშაობენ ამ ზარალის შემცირებაზე, თუმცა ჯერჯერობით მომხმარებლის კეთილ ნებაზე გავლენის მოხდენის მექანიზმი არ გააჩნიათ.