2019 წლის 31 ოქტომბერი რთულად გადასაგორებელი აღმოჩნდა. ამ დღეს ჟურნალისტების, პოლიტიკოსების, მორწმუნეების თუ არამორწმუნეების ყურადღება ერთი და იმავე მიმართულებით, სინოდისკენ იყო მიპყრობილი. სანამ სასულიერო პირები ერთმანეთზე საოცრებებს ამბობდნენ და ამ თემაზე შექმნილი მიმების სქროლვას ვერ ავუდიოდით, მსოფლიოში სხვა ამბებიც მოხდა, რომლებიც, ბუნებრივია, გამოგვრჩა.

ამ სიცარიელის სწრაფად ამოსავსებად კი შევეცდებით, რომ 7 მათგანზე მოგიყვეთ:

1. ილონ მასკმა ხეების დასარგავად მილიონი გამოყო

ილონ მასკმა მილიონი ხის დასარგავად კამპანია #TeamTrees-ში მილიონი დოლარი გადარიცხა ($1 ერთი ხისთვის). ამით ის იუთუბერ ჯიმი დონალდსონის ინიციატივას შეუერთდა, რომლის ფარგლებშიც ცნობილი ადამიანებისა და იუთუბერების დახმარებით $20 მილიონი უნდა აგროვდეს. კამპანიის მიზანი ტყეების გადარჩენა და სწრაფი კლიმატური ცვლილებების შეჩერებაა.

ეს ამბავი განსაკუთრებით საინტერესოა იმ ფონზე, რომ მასკი ამჟამად რთულ ფინანსურ მდგომარეობაშია.

2. კალიფორნიის ხანძრის დროს ცხენი სხვა ცხენების გადასარჩენად უკან მიბრუნდა

კალიფორნიაში ისევ ტყის ხანძრები მძვინვარებს და უკვე ათასობით ადამიანის ევაკუაცია გახდა საჭირო. ევაკუაციის გაშუქების დროს კი CBS News-მა შემთხვევით გადაიღო ცხენი, რომელიც ორი სხვა ცხენის გადასარჩენად ცეცხლში გახვეულ ტერიტორიაზე მიბრუნდა.

ცხოველი უკვე სამშვიდობოზე იყო, როცა მან ცეცხლმოდებულ ტერიტორიაზე დარჩენილების გამოსაყვანად თავი საფრთხეში ჩაიგდო.

3. ამერიკელმა ფისომ თავისი ღიმილით ყველას შეაყვარა თავი

რამდენიმე დღის წინ მსოფლიომ გაიცნო კნუტი, რომელსაც კამერის წინ პოზიორობა უყვარს და მომაჯადოებელი ღიმილი აქვს. ფოტოები ელვის სისწრაფით მოედო მსოფლიოს.

"გადავწყვიტე, რომ ჩემი კნუტებისთვის ფოტოები გადამეღო. ერთ-ერთი მათგანი კი კამერის წინ იღიმოდა", — წერდა ტვიტერზე მისი პატრონი.

4. ძაღლი, რომელიც თბილისში პატრონმა დაჭრა, თავს უკეთ გრძნობს

აგვისტოში გავრცელდა ინფორმაცია, რომ თბილისში კაცმა საკუთარი ძაღლი დაჭრა და მისი დახრჩობა სცადა. პოლიციამ ის ცხოველთან სასტიკად მოპყრობის ბრალდების გამო დააკავა. ცხოველი კი თავშესაფარში გადაიყვანეს სადაც მას შესაბამისი მკურნალობა და რეაბილიტაცია ჩაუტარდა.

ცხოველთა მონიტორინგის სამსახურის წარმომადგენელთან, ნატა უზუნაშვილთან გასაუბრების შემდეგ გავარკვიეთ, რომ ძაღლი დღეს თავს კარგად გრძნობს და ახალი მოსიყვარულე პატრონის გამოჩენას ელოდება.

5. ფლორიდელმა მედდებმა უსახლკაროებისთვის წყალგაუმტარი თბილი კარვები შექმნეს

ფლორიდელმა მედდებმა უსახლკაროების დასახმარებლად არაჩვეულებრივი გზა გამონახეს. იმისათვის, რომ მათ არასდროს შესცივდეთ და უფრო კომფორტულად შეძლონ ძილი, მედდებმა წყალგაუმტარი, თბილი კარვები შექმნეს, რომელიც წვიმას არ ატარებს.

"შევამჩნიე, რომ ეს სტერილური შესაფუთი საკმაოდ გამძლე მასალით იყო დამზადებული და ვიფიქრე, რომ უსახლკაროების დასახმარებლად გამოგვადგებოდა", — ამბობს ერთ-ერთი მედდა, ნიკოლ ჰაბარდი.

6. Airbnb ხანძრებით დაზარალებულებს დროებით საცხოვრებლებს $0-ად სთავაზობს

აშშ-ში, კალიფორნიის შტატში, ტყის ხანძრების გამო ათასობით ადამიანი დარჩა უსახლკაროდ — Airbnb-მ გადაწყვიტა, მათთვის დროებითი საცხოვრებლები $0-ად შეეთავაზებინა.

"Airbnb მასპინძლები ნაპაში, სოლანოში, მარინში, საკრამენტოში, გლენში, ტეჰამასა და კოლუზაში მზად არიან, რომ გაჭირვებაში მყოფ ადამიანებს დაეხმარონ და სრულიად უსასყიდლოდ უმასპინძლონ", — აცხადებს კომპანია და პოტენციურ მასპინძლებს მოუწოდებს, ამ ინიციატივას შეუერთდნენ.

7. შავმა ლაბრადორმა ფიცი დადო, რომ სექსუალური ძალადობის მსხვერპლებს დაეხმარება

აშშ-ში, კუკის საოლქო განყოფილებაში უჩვეულო ცერემონია ჩატარდა — თერაპიისთვის გამოწვრთნილმა შავმა ლაბრადორმა ჰათიმ ფიცი დადო, რომ სექსუალური ძალადობის მსხვერპლებს ყოველთვის დაეხმარება.

ამასთანავე ცხოველი საკუთარ კოლეგებს წელიწადში ორასამდე საქმის გამოძიებაში შეუწყობს ხელს. "კეთილი იყოს შენი მობრძანება გუნდში", — წერია კუკის ოლქის პროკურატურის ოფიციალურ ფეისბუქგვერდზე.