სახალხო დამცველმა შრომით ურთიერთობაში კერძო კომპანიის ხელმძღვანელის მხრიდან სექსუალური შევიწროების ფაქტი დაადგინა. მათი ცნობით, განმცხადებლის ინტერესებს საქართველოს ახალგაზრდა იურისტთა ასოციაცია იცავდა.

აპარატის ინფორმაციით, განმცხადებელი კომპანიაში სტაჟირებას გადიოდა.

"განმცხადებლის მითითებით, მისი უშუალო ხელმძღვანელის მხრიდან ადგილი ჰქონდა არასასურველ სექსუალური ხასიათის სიტყვიერ და ფიზიკურ ქმედებებს, რის გამოც განმცხადებელს შეექმნა დამამცირებელი სამუშაო გარემო და იძულებული გახდა, სამსახური დაეტოვებინა", — აღნიშნულია განცხადებაში.

მათი ცნობით, განმცხადებლის მიერ სახალხო დამცველისთვის წარდგენილი მტკიცებულებები ამყარებდა მის მიერ მითითებულ ფაქტობრივ გარემოებებს, ხოლო მოპასუხე მხარის არგუმენტაცია, წარმოშობილი ვარაუდის გასაქარწყლებლად საკმარისი არ აღმოჩნდა.

ომბუდსმენი კერძო კომპანიის ხელმძღვანელს მიმართა, მომავალში, პროფესიულ თუ სხვა სახის ურთიერთობებში, "არ განახორციელოს სექსუალური შევიწროება და არ შეუქმნას ინდივიდებს შეურაცხმყოფელი, დამამცირებელი მათი ღირსებისთვის შეუსაბამო სამუშაო გარემო". ასევე, კომპანიას — დისკრიმინაციის ამკრძალავი დებულებები ასახოს შრომის
შინაგანაწესში, კოლექტიურ ხელშეკრულებებსა და სხვა დოკუმენტებში, უზრუნველყოს მათი შესრულება და გაატაროს ღონისძიებები სამუშაო ადგილზე პირთა მიმართ თანაბარი მოპყრობის პრინციპის დაცვის უზრუნველსაყოფად.