გრეტა თუნბერგმა გარემოს დაცვისთვის მინიჭებული ჯილდო და პრემია არ მიიღო, რადგან ამჯერად კალიფორნიაში იმყოფება და ამასთან ერთად, მისი სიტყვებით "კლიმატის აქტივიზმს ჯილდოები არ სჭირდება".

თუმცა მან ჩრდილოეთის საბჭოს მადლობა გადაუხადა და განაცხადა, რომ მისთვის ეს ჯილდო დიდი პატივი იყო.

წელს ვარაუდობდნენ, რომ მშვიდობის დარგში ნობელის პრემიას გრეტა თუნბერგი მიიღებდა, თუმცა ეს პატივი ეთიოპიის პრემიერმინისტრს, აბი აჰმედს ერგო.

ჩრდილოეთის საბჭოს პრიზის მიღების შემთხვევაში, თუნბერგი პრემიის სახით ნახევარ მილიონ კრონას მიიღებდა, რაც 51 ათასი დოლარის ეკვივალენტია. გაერთიანებაში 8 სახელმწიფო შედის, მათ შორის დანია, ისლანდია, ნორვეგია, ფინეთი და გრეტას სამშობლო - შვედეთი.

გრეტამ თავისი გადაწყვეტილება ინსტაგრამის პოსტში ახსნა:

"პოლიტიკოსებმა და ძალაუფლების მქონე ადმიანებმა უნდა მოუსმინონ და გაითვალისწინონ მეცნიერებისთვის ამ დროისთვის ყველაზე ხელმისაწვდომი ფაქტები".

მისი თქმით, როდესაც საქმე გარემოს დაცვას ეხება, ჩრდილოეთის საბჭოს ქვეყნებს კარგი რეპუტაცია აქვს.