საქართველოს მეოთხე პრეზიდენტი, გიორგი მარგველაშვილი ამბობს, რომ გამორიცხულია ყოფილ პრემიერს, გიორგი კვირიკაშვილს საქართველოს პატრიარქის, ილია მეორეს გადაყენებაზე ესაუბრა. ასე გამოეხმაურა მარგველაშვილი ფორმულას ეთერში ბოდბელი ეპისკოპოსის, იაკობის ბრალდებას.

"შეხვედრას, სადაც შეიძლება ესწრებოდეს კვირიკაშვილი და საუბრობდეს პატრიარქის გადაყენებაზე, უბრალოდ, რამდენადაც შეიძლება მე ვიცოდე ადამიანების, პოლიტიკოსების შესახებ და ა.შ. მინდა გითხრათ, რომ გამორიცხულია... ინტერესი ხელისუფლებისა ეკლესიის მიმართ ყველა პოლიტიკურ სისტემაში არსებობს, მაგრამ ამ ტიპის შეხვედრა, სადაც საუბარია პატრიარქის გადაყენებაზე, რომელსაც ესწრება რამდენიმე მაღალი თანამდებობის პირი, ასეთ თემებზე არ საუბრობენ ერთად და ისეთ ადამიანებთან", — თქვა მარგველაშვილმა სოფო ზურაბიანის გადაცემაში პოლიტიკის ფორმულა.

რამდენიმე დღის წინ ბოდბელმა ეპისკოპოსმა იაკობმა ყოფილ პრემიერ, გიორგი კვირიკაშვილის კაბინეტში გამართული შეხვედრა გაიხსენა, სადაც "ეჩალიჩებოდნენ პატრიარქის გადაყენებაზე და შიო მუჯირის პატრიარქად არჩევაზე". მისი თქმით, სახელმწიფო უსაფრთხოების სამსახურის მაშინდელ უფროსთან, ვახტანგ გომელაურთან და გიორგი გახარიასთან ერთად გაიმართა ეს შეხვედრა.