უზენაესის მოსამართლეობის კანდიდატი და საკონსტიტუციო სასამართლოს ყოფილი მოსამართლე, ლალი ფაფიაშვილი ამბობს, რომ შეწყალების აქტის განხორციელებისას პრეზიდენტი ანგარიშვალდებულია მოსახლეობას თავისი გადაწყვეტილება აუხსნას. შეწყალებასთან დაკავშირებით ფაფიაშვილს პარლამენტში დეპუტატმა, ნინო გოგუაძემ დაუსვა კითხვა. გოგუაძეს არ დაუკონკრეტებია რომელიმე პრეზიდენტს თუ გულისხმობდა.

"ეს რაკი მისი დისკრეციული უფლება-მოსილებაა, მას ვალდებულება, როგორც ასეთი, აქედან გამომდინარე არ აქვს. მაგრამ თუ იქიდან გამოვალთ, რომ პრეზიდენტი არის ხალხის მიერ არჩეული და ხალხის უშუალოდ მონაწილეობით არჩეული პიროვნებაა, მაშინ ის, რა თქმა უნდა, ანგარიშვალდებულია მოსახლეობის წინაშე. მან უნდა აუხსნას რატომ მიიღო ესა თუ ის გადაწყვეტილება", — აღნიშნა ფაფიაშვილმა.

დღეს, 25 ოქტომბერს პარლამენტში უზენაესის მოსამართლეობის კანდიდატს, ლალი ფაფიაშვილს უსმენენ. 2007-2017 წლებში ლალი ფაფიაშვილი საქართველოს საკონსტიტუციო სასამართლოს მოსამართლე იყო, 2016-2017 წლებში კი ამავე სასამართლოს თავმჯდომარის მოადგილე. 1996-2004 წლებში ლალი ფაფიაშვილი მუშაობდა საქართველოს პარლამენტში სხვადასხვა პოზიციაზე: იყო პარლამენტის თავმჯდომარის პირველი თანაშემწე, ასევე 2004-2007 წლებში — პარლამენტის წევრი ნაციონალური მოძრაობა-დემოკრატების პარტიული სიით.

ლალი ფაფიაშვილმა განიხილა საქმე "იური ვაზაგაშვილი საქართველოს პარლამენტის წინააღმდეგ". მოსარჩელე იური ვაზაგაშვილი მიიჩნევდა, რომ მას არ შეეძლო სასამართლოში ედავა, მისი გარდაცვლილი შვილის პატივისა და ღირსების შემლახავი ცნობების გავრცელებაზე, რაც, მისი აზრით, ეწინააღმდეგებოდა სამართლიანი სასამართლოს უფლებას. საკონსტიტუციო სასამართლო არ დაეთანხმა მოსარჩელეს და სადავო ნორმები კონსტიტუციურად მიიჩნია.

2014 წელს ლალი ფაფიაშვილი მონაწილეობდა გადაწყვეტილების მიღებაში, რითაც ფსიქოსოციალური საჭიროების მქონე პირების უფლებრივი მდგომარეობა და ქმედუუნარობის ინსტიტუტი შეიცვალა, ასევე, გაუმჯობესდა ადამიანთა კონკრეტული ჯგუფის უფლებრივი მდგომარეობა.

კანდიდატი მოსამართლე იყო ერთ-ერთი იმ კოლეგიაში, რომელმაც განიხილა საქმე: ჰომოსექსუალიზმი, როგორც სისხლის დონაციის აკრძალვის საფუძველის შესახებ. სასამართლომ რეგულაცია არაკონსტიტუციურად მიიჩნია.