როცა ქალაქის მერი დარწმუნებულია, რომ საზოგადოებრივი ტრასპორტით მოსარგებლეები ბედნიერები არიან, მისი მოადგილე კი 3 მიზეზს ასახელებს, რომლის გამოც ხალხით გაჭედილ მეტროში ყოფნა უნდა გიხაროდეს, ეჭვი გიჩნდება, ეგებ ცდები და გაჭედილ ყვითელ მიკროავტობუსში ან ვაგონში დგომა მართლა სასიამოვნოა. იქნებ, შენი ბრალია და ვერ იაზრებ, როგორ უნდა მიიღო ამ პროცესით სიამოვნება.

მოდი, კადრებს კიდევ ერთხელ უყურე და დაფიქრდი, გაბედნიერებს თუ არა.

ვერაფერი იგრძენი? არ იდარდო, შენ მაგივრად დავსხედით და ჩვენ მოვიფიქრეთ კიდევ 10 მიზეზი, რომელიც ბედნიერების განცდაში დაგეხმარება.

1. სოციალურმა ქსელმა ხალხი ერთმანეთს დააშორა, შენ კი შანსი გაქვს ადამიანებთან იურთიერთო

თუკი მეტროში ყოფნისას ყურსასმენებს ცოტა ხნით მოიხსნი და გვერდით მიმოიხედავ, აუცილებლად, დაინახავ "ბედნიერ და ღიმილიან" სახეებს. ერთ ჭერქვეშ მყოფებს ერთი გრძნობა გაერთიანებთ. თუ ამ ხახლთან საუბარს წამოიწყებ, მეტროს გვირაბის გავლა ნამდვილ თავგადასავლად იქცევა.

2. უსიამოვნო შეხვედრას თავს მარტივად აარიდებ

ხალხთან ურთიერთობა, რა თქმა უნდა, კარგია, მაგრამ ყველას გვქონია მომენტი, როცა არც ისე საყვარელი ნაცნობი ქუჩაში გხვდება და თუ შეგვამჩნია, გასაქცევი არსად გვაქვს. ხალხმრავალ მეტროში ამ პრობლემას მარტივად მოაგვარებ, ზედმეტი ძალისხმევის გარეშე, უბრალოდ, ხალში ჩაიკარგები.

3. ჩახუტების დღეს ყოველდღე აღნიშნავ

რადგან ვთანხმდებით, რომ ხალხმრავლობაში ყოფნა სასიხარულოა, ამ სიტუაციით უნდა ვისარგებლოთ. შეგვიძლია მსოფლიო გავაოცოთ იმით, რომ ჩახუტების დღე ყოველდღიურად აღვნიშნოთ.

4. ბავშვს სკოლაში მარტო აღარ გაუშვებ

თუკი დატვირთული სამუშაო გრაფიკი გაქვს და ნერვიულობ იმაზე, რომ შვილის სკოლაში მიცილებას ვერ ასწრებ, ეს პრობლემაც მოგვარებულია. შენს შვილს სკოლაში ათიათასობით თვალი გააცილებს.

5. სამსახურში მხოლოდ შენ არ დააგვიანებ

თუკი სამსახურში შენი დაგვიანებით "გაბედნიერებული" უფროსი შეგხვდება შეგიძლია მოუყვე, როგორ გაიცანი მეტროში ხალხი, აღნიშნე ჩახუტების დღე და სხვა თავგადასავლებიც გამოიარე. ისიც ყურადღებით მოგისმენს, არაფერს გეტყვის, რადგან იმავე მიზეზით თავადაც დააგვიანა და სულ რაღაც 1 წუთით მიგასწრო ოფისში.

6. მიხვდები, რომ ქართველობა არ გადაშენებულა

სასიხარულო მიზეზი იმ ხალხსაც ვუპოვეთ, ვინც მუდმივად უკმაყოფილოა და ქვეყნის გენოფონდი ადარდებს. გარეთ გამოიხედე, კი არადა, მეტროში ჩადი და აღმოაჩენ, რომ ქართველობა არსად გადაშენებულა. ბევრნი ვართ.

7. შეგიძლია თავი გადასაღებ მოედანზე იგრძნო

წარმოიდგინე როგორ მოუხდებოდა ეს კადრები ფილმ მუმიას. დღეიდან მეტროში ჩასვლისას ყველა ვიძახით: იმჰოტეპ, იმჰოტეპ...

8. ჯიბის ქურდი ვერ გაგექცევა

როგორც ჩანს, ქურდობის პრევენციისთვის შინაგან საქმეთა სამინისტროსთან აქტიური თანამშრომლობაა დაწყებული. ხალხმრავლობაში ჯიბის ქურდი შენი ტელეფონით ან საფულით ვერსად გაიქცევა, რადგან გასაქცევი ადგილი არ არის. აღიარე, ნამდვილად დასაფასებელია.

9. ზამთარში არ შეგცივდება

თუ თბილი ქურთუკის ყიდვა ჯერ ვერ მოასწარი ან გარეთ კომბოსტოსოვით სიარული არ გიყვარს, შეგიძლია ამაზეც აღარ ინერვიულო. სახლიდან მაისურით გამოდი, რადგან მეტროში ძალიან თბილა.

10. მეტი პოზიტივი ერში

და ბოლოს, არ უნდა დაგვავიწყდეს, რომ მერის მოადგილემ ბედნიერების ერთ-ერთ მიზეზად საცობების განტვირთვა დაასახელა. ეს კი კიდევ ერთი ბედნიერების მიზეზს გვიჩენს — პოზიტივის გაზიარება.

წარმოიდგინეთ, რომ პრიუსი და ჯიპი საცობის ნაცვლად, შუქნიშანთან ხვდებიან ერთამენთს. ფანჯარას ჩამოწევენ და ერთმანეთს გულითადად მოიკითხავენ. ოღონდ კარგებს და კეთილებს კი არა, მართლა ერთმანეთს.

იმედი გვაქვს გაგაბედნიერეთ. ჩვენი და მერის მოადგილის წყალობით უკვე 13 მიზეზი გაქვს ამისთვის.

კიდევ არ ხარ ბედნიერი?..