6 გრემის მფლობელი ბრიტანული როკ ბენდი ქოლდფლეი 4 წლის შემდეგ პირველ ალბომს გამოუშვებს. როგორც ჩანს მათ მთელი ემოციები მერვე სტუდიურ ალბომში, Everyday Life ჩადეს და ამ ამბის ჩვენამდე მოსატანად ბევრი არ უხმაურიათ.

ქოლდფლეიმ ალბომის დასაანონსებლად არატრადიციულ მეთოდს მიმართა, ფანებს წერილები გაუგზავნა და ბრაზილიის მეტროსადგურში აბრა განათავსა, თუმცა ამის პარალელურად სოციალურ მედიებში პროფილის ფოტოებს ცვლიდა და დუმილს ინარჩუნებდა.

როგორც მსმენელისთვის გაგზავნილ წერილში კრისი, ჯონი, გაი და უილი წერენ, ალბომი 22 ნოემბერს გამოდის და ის ორად იქნება გაყოფილი. ერთს ერქმევა Sunrise (მზის ამოსვლა), ხოლო მეორეს — Sunset (მზის ჩასვლა).

ახალი ალბომის სავარაუდო ყდა მუსიკალური ჯგუფის ინსტაგრამზეც გამოჩნდა.

ქოლდფლეის ალბომები ბრიტანულ ბენდებს შორის 21-ე საუკუნეში ყველაზე გაყიდვადია. A Head Full of Dreams ბოლო ალბომია, რომელიც 2015 წელს გამოვიდა.