ყველა პარტია, რომელმაც 5-პროცენტიანი საარჩევნო ბარიერი გადალახა, სახელმწიფო ბიუჯეტიდან ერთჯერადად მილიონ ლარამდე მიიღებს, წინასაარჩევნო კამპანიის ხარჯების დასაფარად.

ეს პარტიებია:

  • ქართული ოცნება - 48,67%
  • ერთიანი ნაციონალური მოძრაობა - 27,11%
  • პატრიოტთა ალიანსი - 5,01%

ნინო რიჟამაძე, იურისტი.

ფოტო: რადიო თავისუფლება

"ეს უპირობოდ 1 მილიონი ლარი არ იქნება, ეს იქნება კამპანიის ხარჯების დაფარვა ერთ მილიონ ლარამდე" - აცხადებს On.ge-სთან საუბრისას სამართლიანი არჩევნების იურისტი ნინი რიჟამაძე.

იურისტის თქმით, პარლამენტში შესულმა პოლიტიკურმა სუბიექტებმა სახელმწიფო ბიუჯეტიდან მილიონამდე ლარის მისაღებად ხარჯთაღრიცხვა უნდა წარადგინონ:

"თუ პარტია წარადგენს ხარჯთაღრიცხვას, რომ მილიონამდე ლარის ხარჯი გასწია წინასაარჩევნოდ, მაშინ ისინი ამას მიიღებენ".

ნინო რიჟამაძის თქმით, სახელმწიფო დაფინანსება გამოყოფილია იმ პარტიებისთვისაც, რომლებმაც 3% ან მეტი მიიღეს არჩევნებში:

"სახელმწიფო დაფინანსება გამოყოფილია სხვა პოლიტიკური სუბიექტებისთვისაც და მას მიიღებენ ის პარტიები, რომლებმაც 3% და მეტი მიიღეს საერთო პროპორციული სისტემით ჩატარებულ არჩევნებზე. მათთვის არსებობს საბაზისო დაფინანსება, რომელიც შეადგენს წმინდად 300 000 ლარს".

2016 წლის საპარლამენტო არჩევნების შედეგების მიხედვით, ასეთი სულ 4 პარტიაა, რომელმაც ამომრჩევლის 3-დან 5%-მდე ხმა დააგროვა:

  • თავისუფალი დემოკრატები - 4,63%
  • ნინო ბურჯანაძე - დემოკრატიული მოძრაობა - 3,53%
  • პაატა ბურჭულაძე - სახელმწიფო ხალხისთვის - 3,45%
  • ლეიბორისტული პარტია - 3,14%

იმ პარტიებისთვის, რომლებიც პარლამენტში შედიან, ყოველწლიური დაფინანსება გამოითვლება სპეციალური ფორმულით.

ასევე, ის პარტია, რომელსაც 10 წევრს შორის 3 ქალი ეყოლება, სახელმწიფო ბიუჯეტიდან ყოველწლიურად დამატებით ანაზღაურებას მიიღებს.

კვალიფიციური სუბიექტები ასევე ისარგებლებენ უფასო სატელევიზიო დროით არჩევნებამდე 50 დღით ადრე. ესენი არიან ის პარტიები, რომლებიც სახელმწიფო დაფინანსებას იღებენ. ისინი სარგებლობენ თავისუფალი სარეკლამო დროით, არაუმეტეს 90 წამისა, 3 საათში ერთხელ.