უზენაესის მოსამართლეობის კანდიდატი და საკონსტიტუციო სასამართლოს მოქმედი თავმჯდომარე, ზაზა თავაძე მოადგილის მიერ მიღებულ გადაწყვეტილებებს სამარცხვინოს უწოდებს. თუმცა, საკონსტიტუციო სასამართლოში მერაბ ტურავა მის მოადგილედ მისივე გადაწყვეტილებით დაინიშნა.

ამ თემაზე კანდიდატს კითხვები დეპუტატმა გიგა ბოკერიამ დაუსვა და მერაბ ტურაავას საქმიანობა გაახსენა:

  • ბრალდებულის გასამართლებლად საოკუპაციო ხელისუფლების დოკუმენტი იურიდიულ მტკიცებულებად გამოიყენა;
  • სამართალდამცავი ქრთამის აღებაში ხელფასის არ ქონის მიზეზით გაამართლა;
  • ხელისუფლების ზეწოლის გამო კი საკონსტიტუციო სასამართლოში საქმის გაჭიანურებისთვის თვითნებურად საავადმყოფოში დაწვა.

ამ მაგალითების მოსმენის შემდეგ ზაზა თავაძემ თქვა, რომ სამივე გადაწყვეტილებას ეწინააღმდეგებოდა და ეს მოსამართლისთვის შეუფერებელი საქციელი იყო. კითხვაზე, მაშინ რატომ წარადგინა ასეთი კანდიდატურა მოადგილედ, ზაზა თავაძემ უპასუხა, რომ ის მოსამართლე აარჩია, რომელსაც სხვებთან შედარებით მეტი გამოცდილება ჰქონდა.

ზაზა თავაძე 2016 წლის 20 ოქტომბრიდან საკონსტიტუციო სასამართლოს თავმჯდომარეა. 2010 წლიდან იგი ამავე სასამართლოს მოსამართლე იყო. 2008-2010 წლებში კი იყო საქართველოს იუსტიციის მინისტრის მოადგილე.

გაიგეთ მეტი: