უზენაესის მოსამართლეობის კანდიდატმა, შალვა თადუმაძემ ვერ გაიხსენა საგანი, რომლითაც პირველ კურსზე მან სამართლის შესწავლა დაიწყო. საგნის დასახელება ნაციონალური მოძრაობის დეპუტატმა, სალომე სამადაშვილმა ითხოვა.

თადუმაძემ უპასუხა, რომ მას არ ახსოვს რა საგანი გაიარა პირველ კურსზე, რაზეც სამადაშვილმა უპასუხა:

"მსოფლიოს ყველა ქვეყანაში, ყველა იურისტი, ნებისმიერ უმაღლეს სასწავლებელში, სამართლებრივ განათლებას იწყებს რომაული სამართლის საფუძვლებით".

შალვა თადუმაძის დიპლომთან დაკავშირებით კითხვები არსებობს. ამ საკითხზე საუბრობენ როგორც არასამთავრობო ორგანიზაციები და სახალხო დამცველი, ისე ოპოზიცია და ხელისუფლება. ამ საკითხზე მას კითხვა დღევანდელ კომიტეტის სხდომაზეც დაუსვეს. დოკუმენტების მიხედვით, თადუმაძემ 1993 წელს ჩააბარა იმ უნივერსიტეტში, რომელიც 1994 წელს დაარსდა.

შალვა თადუმაძე ამბობს, რომ მან ინსტიტუტში 16 წლის ასაკში 1994 წელს ჩააბარა, იმავე წელს, რა წელსაც დაარსდა სასწავლებელი. მისივე მტკიცებით, 1998 წელს მან ხუთწლიანი სასწავლო კურსი ექსტერნად დაასრულა. თადუმაძის განმარტებით, დიპლომში ჩაიწერა ინსტიტუტის დასრულების თარიღი და სასწავლო კურსის ხუთწლიანი ხანგრძლივობა, რამაც ორაზროვნება გამოიწვია.