"ექნება თუ არა პუტინს გზა მეზობელი საქართველოსკენ? არჩევნები, რომელიც შეამოწმებს, რამდენად შორს შეუძლია რუსეთს თავისი ძალის გამოვლენა", - ამ სათაურით Los Angeles Times საქართველოს 8 ოქტომბრის არჩევნებთან დაკავშირებით სტატიას აქვეყნებს, რომელშიც ნიკოლას უალერი წერს, რომ საქართველოს პარლამენტში პრორუსული პარტია - პატრიოტთა ალიანსი შევიდა, ვლადიმერ პუტინი კი კვლავ უცდის შანს, რომ მოსკოვმა საქართველო თავის ორბიტაზე დააბრუნოს.

გამოცემა წერს, რომ პატრიოტთა ალიანსის მსგავსი ხედვების მქონე პარტიები იმ ადამიანებისთვის, ვისაც საბჭოთა კავშირისადმი ნოსტალგიური განწყობები აქვთ, ერთგვარი ალტერნატივაა და თანაც, ქართული მართლმადიდებლური ეკლესიის რადიკალურად განწყობილი ფრთისგან მხარდაჭერილნიც კი არიან:

"პატრიოტთა ალიანსი თავისი ქსენოფობიური, ანტიდასავლური და ორთოდოქსულ-ქრისტიანულ ღირებულებებზე საუბრით, ქალთა და ლგბტ თემის უფლებების უარყოფით გამოირჩევა. მის ლიდერს, ირმა ინაშვილს კი იმედი აქვს, რომ ქვეყნის ნატოსკენ გადადგმული ნაბიჯების დაბლოკვას შეძლებს".

გამოცემაში საქართველოს პატრიარქი, ილია მეორე მოხსენიებულია, როგორც "კაგებეს" ყოფილი ინფორმატორი და აღნიშნულია, რომ ის და ეკლესია ქვეყანას ევრაზიული კავშირისკენ სვლაში ეხმარებიან, რომელსაც რუსეთის პატრიარქი კირილე და ვლადიმერ პუტინის მთავარი იდეოლოგი, ალექსანდრ დუგინი უჭერენ მხარს.

მალასაში NATO-ს საკითხებზე საკონსულტაციო ოფისის წარმომადგენელი, გუცა გველესიანი პატრიოტთა ალიანსის პარლამენტში შესვლას ეხმაურება და ამბობს, რომ პარტია აიღებს პუტინის ფულს და გაქრება:

"იმედს ვიტოვებ, რომ ფაქტობრივ მართვაზე არაფერი იციან და შემდეგ არჩევნებს წააგებენ. ყველა შემთხვევაში, მათი მხარდაჭერა პუტინის ფულიდან მოდის".

ლოს ანჯელეს ტაიმსი 2012 წლის საპარლამენტო არჩევნებსა და ქართული ოცნებისა და მისი არაფორმალური მმართველის, მილიარდერი, ბიძინა ივანიშვილის მიერ ენმ-ს დამარცხებაზეც საუბრობს. სტატიაში აღნიშნულია, რომ ივანიშვილის რუს ბიზნესმენებთან კავშირები ბევრ ქართველს აღელვებს, რადგან ის რუსეთთან ურთიერთობის დათბობას ცდილობს.

სტატიაში აღნიშნულია, რომ მიუხედავად ზემოაღნიშნული ორი ძალის დაპირისპირებისა, ისინი აცხადებენ, რომ ნატოსა და ევროკავშირში გაწევრიანება სურთ, თუმცა პროცესი საკმაოდ გაჭიანურებულია:

"ბრიუსელს საქართველოსთვის ევროკავშირში გადაადგილების უვიზო რეჟიმი ამ დრომდე არ მიუნიჭებია. ნატო კი შერეულ სიგნალებს აგზავნის იმ იმედით, რომ რუსეთს პროვოცირებას არ უკეთებს, მიუხედავად იმისა, რომ ბოლო დროს ის ამბობს, რომ მხარს უჭერს საქართველოს ალიანსში გაწევრიანებას".

გამოცემაში აღწერილია საარჩევნო პერიოდი საქართველოში და წერია, რომ ისევე როგორც წინა წლებში, ხასიათდებოდა ფარული ჩანაწერების გამოქვეყნებით, თავდასხმებითა და საარჩევნო უბნების დარბევით.

ავტორი წერს, რომ 1991 წლიდან, მას შემდეგ, რაც საქართველო მოსკოვის ორბიტას მოწყდა, საქართველომ წლები სამოქალაქო დაპირისპირებებსა და კრიმინალზე დაკარგა მანამ, სანამ 2003 წელს მიხეილ სააკაშვილის პროდასავლური პარტია ქვეყნის სათავეში არ მოვიდა.