პენიტენციური სამსახურის ცნობით, საგამოძიებო სამსახურმა ქუთაისის ციხეში პატიმრის სუიციდის საქმეზე კამერების მეთვალყურეს წაუყენა ბრალი. უწყების მტკიცებით, გამოძიებამ დაადგინა, რომ მეთვალყურეობის სამმართველოს ინსპექტორმა სამსახურებრივი მოვალეობა შეასრულა არაჯეროვნად.

"ხელისშემშლელი გარემოებების არარსებობის მიუხედავად, ინსპექტორმა არ განახორციელა სათვალთვალო მონიტორების სათანადო კონტროლი, რის გამოც მას თვალთახედვის არიდან გამორჩა ბრალდებულის მიერ ცხაურზე თავის დაკიდების ფაქტი და ამის შესახებ დახმარების აღმოჩენაზე პასუხისმგებელ თანამშრომლებს შეატყობინა 40 წუთის დაგვიანებით. ინსპექტორის ქმედებას შედეგად მოჰყვა ბრალდებული გ.წ.-ს გარდაცვალება", — ნათქვამია უწყების განცხადებაში.

8 ოქტომბერს, მეთვალყურე ბრალდებულის სახით სისხლის სამართლის პასუხისგებაში მიეცა სისხლის სამართლის კოდექსის 3421-ე მუხლის მეორე ნაწილით გათვალისწინებული დანაშაულის ჩადენის საქმეზე, რაც სასჯელის სახით ითვალისწინებს თავისუფლების აღკვეთას ვადით სამიდან ხუთ წლამდე.

მანამდე, პატიმრის სავარაუდო თვითმკვლელობის შემდეგ ქუთაისში საპატიმრო დაწესებულების ხელმძღვანელი გაათავისუფლეს.