საქართველოს ყოფილმა პრეზიდენტმა მიხეილ სააკაშვილმა საკუთარ ფეისბუკის გვერდზე გავრცელებულ ვიდეოგანცხადებაში, საპარლამენტო არჩევნების შედეგებზე ისაუბრა. მისი თქმით, არჩევნები დიდი რაოდენობის დარღვევებით ჩატარდა და ამიტომ მეორე ტურში კანდიდატების მონაწილეობას აზრი არ აქვს რადგან მისივე თქმით, ისევ გაყალბდება:

"ამ სიტუაციაში, საუბარი იმაზე რომ მეორე ტურში ეს რამე შეიცვლება სანამ მთავარი ფაქტორები არის იქ, რა თქმა უნდა უაზრობაა. მეორე ტურის წინ ივანიშვილს ნათქვამი აქვს, რომ ის მის კანდიდატებს გაამარჯვებს ყველა ოლქებში და რა თქმა უნდა დღევანდელი საარჩევნო სისტემის პირობებში ასეც იქნება. ამიტომ, პირდაპირ მინდა გითხრათ მე ვერ ვხედავ აზრს, რა თქმა უნდა ეს ყველა კანდიდატის ინდივიდუალური გადასაწყვეტია, მეორე ტურში მონაწილეობის და ამითი პრაქტიკულად ლეგიტიმაციის ძალიან უხეში დარღვევებით ჩატარებული არჩევნების".

ყოფილმა პრეზიდენტმა ნაციონალური მოძრაობის გეგმებზეც ისაუბრა და განაცხადა რომ ქართული ოცნების მიერ მოპოვებული საკონსტიტუციო უმრავლესობა საფრთხის შემცველია:

"ახლა არ არის ხელების ჩამოშვებისა და ფრუსტრაციის დრო. ჩვენ ყველას კარგად გვესმის რომ შემდგონმი პერიოდი იქნება რთული. ივანიშვილმა როგორც დააანონსა მოიპოვა საკონსტიტუციო უმრავლესობა. ის შეეცდება პარლამენტის ქუთაისიდან თბილისში დაბრუნებას, საპრეზიდენტო პირდაპირი არჩევნების გაუქმენას, ის აუცილებლად შეეცდება რუსთავი 2-ის მთლი მენეჯმენტის გამოცვლას და მთლიანად სარედაქციო პოლიტიკის შეცვლას და ზოგადად მედიის აბსოლიტურ კონტროლს.

მე ვფიქრობ რომ დღეს ნაციონალური მოძრაობის არჩეული დეპუტატების და პარლამენტში დაშვებული დეპუტატების როგორც მინიმუმ ვალდებულებაა შეხვდნენ საქართველოს ყველა რეგიონში იმ ხალხს ვინც მხარი დაგვიჭირა, ჩვენს აქტივისტებს ვის მხრებზეც გადაიარა ამ არჩევნებმა და მანამ სანამ რამე გადაწყვეტილებას მიიღებენ ამ თემაზე და ვიმეორებ რომ არგუმენტები აქვს ორივე მხარეს მონაწილეობასაც და არ მონაწილეობასაც, მაინც იკითხონ ჩვენი აქტივის ჩვენი მხარდამჭერების აზრი".