მთავრობის დადგენილებით, ილიას სახელმწიფო უნივერსიტეტს აბასთუმნის ობსერვატორიის მართვის უფლება ჩამოერთმევა. შესაბამისი დადგენილება 30 სექტემბერს გამოქვეყნდა.

მთავრობის გადაწყვეტილებით ილიაუნის სტრუქტურაში შემავალი დამოუკიდებელი სამეცნიერო-კვლევითი ერთეული ევგენი ხარაძის ეროვნული ასტროფიზიკური ობსერვატორია ცალკე სსიპ-დ ჩამოყალიბდება. ობსერვატორიაზე სახელმწიფო კონტროლს განათლების სამინისტო განახორციელებს. უწყებამ უნდა დაამტკიცოს ობსერვატორის წესდება და უზრუნველყოს უფლებამოსილი პირის დანიშვნა.

ილიას სახელმწიფო უნივერსიტეტის ადმინისტრაციის ხელმძღვანელი ქეთევან ლაკირბაია განმარტავს, რომ ობსერვატორია უნივერსიტეტის საკუთრება არ ყოფილა და სახელმწიფოსგან მართვის უფლებით ჰქონდათ გადაცემული. მისივე თქმით, ობსერვატორიას განათლების სამინისტრო აფინანსებდა სახელმწიფო სუბსიდირების ფარგლებში.

ლაკირბაია On.ge-სთან საუბრისას ამბობს, რომ ინფორმაცია ობსერვატორიაზე მართვის უფლების ჩამორთმევის შესახებ განათლების სამინისტროსგან გადაწყვეტილების გამოქვენებამდე მიიღეს. მისი თქმით, ამ ეტაპზე მათთვის უცნობია, ობსერვატორიის განვითარების რა გეგმა აქვს სამინისტროს. შესაბამისად, უცნობია ისიც შეძლებს თუ არა უნივერსიტეტი ობსერვატორიით სარგებლობას სამეცნიერო კვლევებისთვის.