რუსეთის დუმა შვედი ახალგაზრდა ეკოაქტივისტი, გრეტა თუნბერგის მიწვევას არ აპირებს. თუნბერგის მიწვევა დუმის ყველაზე ახალგაზრდა დეპუტატმა, 24 წლის ვასილი ვლასოვმა გადაწყვიტა.

დუმაში ეკოლოგიის კომიტეტის თავმჯდომარემ, ვლადიმერ ბურმატოვმა განაცხადა, ვლასოვს მიწვევის უფლებამოსილება არ აქვს. მისივე თქმით, ამისთვის ყველა დეპუტატის მოსაზრებაა საჭირო.

16 წლის გრეტა თუნბერგი კლიმატის ცვლილების აქტივიზმის მთავარ სახედ იქცა. 2018 წელს მან სტოკჰოლმში, პარლემენტის შენობასთან აქცია მოაწყო და უარი თქვა პარასკეობით სკოლაში სიარულზე, სანამ ხელისუფლება პარიზის შეთანხმების შესრულებას არ დაიწყებდა. თუნბერგის აქციამ დიდი ყურადღება მიიპყრო და მას სხვა მოსწავლეებიც შეუერთდნენ. ამის შემდეგ მას ხშირად იწვევდნენ კონფერენციებსა და აქციებში მონაწილეობისთვის. ის მშვიდობის დარგში ნობელის პრემიაზეც წარადგინეს.

23 სექტემბერს მან გაეროს გენერალური ასამბლეის გახსნაზე კლიმატის ცვლილებასა და მსოფლიო ლიდერების მხრიდან უყურადღებობაზე ისაუბრა.

"ყველაფერი ეს არასწორია. მე აქ არ უნდა ვიყო, სკოლაში უნდა დავბრუნებულიყავი. თქვენი ფუჭი საუბრით მომავალი და ბავშვობა წამართვით. მასობრივი გადაშენება იწყება, მაგრამ ერთადერთი რაზეც საუბრობთ, ფული და ზღაპრებია უსასრულო ეკონომიკურ ზრდაზე. როგორ ბედავთ?!" — აღნიშნა თუნბერგმა ემოციური გამოსვლისას.

სწორედ ეს გამოსვლა გახდა სოციალურ ქსელში კრიტიკისა და თუნბერგის ბულინგის მიზეზი.

ამავე თემაზე:

თავდაპირველად ეწერა, რომ გრეტა თუნბერგი დუმაში მიიწვიეს. დამატებითი ინფორმაციის მიღების შემდეგ, სათაური გასწორდა.