პარლამენტის დეპუტატი, რომან გოცირიძე ამბობს, რომ ნაციონალური მოძრაობა ქრისტიან-დემოკრატიული სახალო პარტია არასდროს ყოფილა. როგორც დეპუტატმა ფეისბუქზე დაწერა, პარტია იყო და რჩება ლიბერალური ორიენტაციის მოძრაობად. ამ განცხადებით გორიციძე პარტიის დამფუძნებლს, მიხეილ სააკაშვილსა და თავმჯდომარეს, გრიგოლ ვაშაძეს ეწინააღმდეგება.

"ჯერჯერობით არავის მოუხდენია ამ ფუნდამენტური ღირებულებების რევიზია (ცვლილება) პარტიის პროგრამაში. სანამ ეს ასეა, ყველა განსხვავებული მოსაზრება აღქმული უნდა იყოს, როგორც კერძო აზრი და არა პარტიის ოფიციალური დოქტრინა", — წერს დეპუტატი.

რომან გოცირიძე აღნიშნავს, რომ ნაციონალური მოძრაობა და ვარდების რევოლუცია ლიბერალური რეფორმების სახელით შევიდა, განსაკუთრებით ეკონომიკის სფეროში. მისივე თქმით, ამ რეფორმების წყალობით საქართველო თანამედროვე ტიპის მიმზიდველი ქვეყანა გახდა.

"ნაციონალური მოძრაობის სიძლიერე მის წარსულშია (მიუხედავად შეცდომებისა და ცალკეული დანაშაულობებისა). მოწყდება თავის ლიბერალურ ფესვებს, თავად გათხრის სამარეს, იმ ღამურად გადაქცეულ თაგვს დაემსგავსება, რომელიც უცხო გახდა, როგორც თავისიანებისთვის, ასევე, იმათთვის, ვისი მსგავსობაც მოინდომა.

ჩვენ ვაშენებდით და საბოლოოდ უნდა ავაშენოთ ისეთი სახელმწიფო, რომელიც გამიჯნული იქნება საზოგადოებაში არსებული სხვადასხვა მორალური დოქტრინებისგან და რელიგიებისგან. საჯარო ინსტიტუტები და სახელმწიფო კანონმდებლობა არ უნდა ეყრდნობოდეს ინდივიდების პირად მორალს ან რელიგიურ შეხედულებებს. არ აქვს მნიშვნელობა ვინმეს ჯვარი უკეთია როგორც ავგაროზი, როგორც სამკაული, როგორც რწმენის ნიშანი თუ საერთოდ არ უკეთია", — წერს დეპუტატი.

ყოფილმა პრეზიდენტმა, მიხეილ სააკაშვილმა 29 სექტემბერს განაცხადა, რომ ყოფილ თანაგუნდელთან და ევროპული საქართველოს ლიდერ გიგა ბოკერიასთან ფუნდამენტური განსხვავება აქვს, რადგან ჯვარს ატარებს. მან, ასევე, რელიგიის მნიშვნელობაზე ისაუბრა გიგა ბოკერიას ბრალს დასდო "ტრადიციული, ქართული, ქრისტიანული ფასეულობებისაგან დისტანცირებაში".

სააკაშვილის ამ განცხადებას კრიტიკულად შეხვდნენ როგორც ევროპულ საქართველოში, ისე ნაციონალურ მოძრაობაში. განცხადების გამო პარტია ნინო ლაპიაშვილმა დატოვა.

ყოფილი პრეზიდენტის თანაგუნდელმა ზაალ უდუმაშვილმა განაცხადა, რომ "ჩვენს გენში ზის ტრადიციები და მას ვერანაირი ლიბერალური მიდგომით ვერ ამოშანთავ". გრიგოლ ვაშაძემ კი აღნიშნა, რომ ნაციონალური მოძრაობა ქრისტიან-დემოკრატიული სახალხო პარტიაა.