შინაგან საქმეთა სამინისტრომ თბილისსა და ახალციხეში ე.წ. ქურდული სამყაროს წევრობისა და ე.წ. კანონიერი ქურდისთვის მიმართვის ბრალდებით ოთხი პირი დააკავა. უწყებაში განმარტავენ, რომ ბრალი სამიდან ათ წლამდე ვადით თავისუფლების აღკვეთას ითვალისწინებს.

გამოძიების ინფორმაციით, 2018 წლის ნოემბერში ორმა ბიზნესპარტნიორმა ფინანსური დავის გადასაწყვეტა ე.წ. კანონიერი ქურდების ჩარევით გადაწყვიტა. მათ ქურდული სამყაროს ორი წევრის დახმარებით თურქეთსა და რუსეთში ე.წ. კანონიერ ქურდებს ჯეირან კინწურაშვილს, იგივე "ჯეირანას" და ედუარდ ასატრიანს, იგივე "ასატრინას" მიმართეს.

"კანონიერმა ქურდებმა დავის გადაწყვეტამდე ბიზნესპარტნიორების ფინანსური დავის შესწავლა ქურდული გარჩევით დაავალეს თავიანთ ნდობით აღჭურვილ პირებს, რომლებიც შეხვდნენ ბიზნესპარტნიორებს და მათ შუამავლებს — ქურდული სამყაროს წევრებს", — აღნიშნულია სამინისტროს განცხადებაში.

უწყების განცხადებით, დავის გადასაწყვეტად ჯეირან კინწურაშვილმა ბიზნესპარტნიორები თურქეთში დაიბარა. სამინისტროს თქმით, შეხვედრაზე მან დავა ნაწილობრივ ერთ-ერთი პარტნიორის სასარგებლოდ გადაწყვიტა, ხოლო მეორე პრის შუამავალს 45 ათასი დოლარის ჩატანა დაავალა:

"დავის საბოლოოდ გადაწყვეტის მიზნით, ე.წ. კანონიერმა ქურდმა ჯეირან კინწურაშვილმა ქურდული გარჩევა თურქეთში კიდევ ორჯერ — 2019 წლის 22 და 29 იანვარს მოაწყო, თუმცა ფინანსური დავა საბოლოოდ ვერ გადაწყდა".

შსს აცხადებენ, რომ ერთ-ერთი დაკავებულის სახლიდან ჩხრეკისას 87 ათასი დოლარი ამოიღეს. ასევე, ამოღებულია კომპიუტერული ტექნიკა და ბრალდებულების მობილური ტელეფონები, რომლითაც ისინი ერთმანეთსა და საზღვარგარეთ მცხოვრებ ქართველ ე.წ. კანონიერ ქურდებს უკავშირდებოდნენ.

გამოძიება ქურდული სამყაროს წევრობისა და ე.წ. კანონიერი ქურდისთვის მიმართვის ბრალდებით, სისხლის სამართლის კოდექსის 223-ე პრიმა მუხლის 1-ლი ნაწილითა და 223-პრიმა ოთხი მუხლის 1-ლი ნაწილით მიმდინარეობს.