ევროპული საქართველო საგარეო საქმეთა მინისტრს, დავით ზალკალიანს პარლამენტში იბარებს რუსეთის საგარეო საქმეთა მინისტთან, სერგეი ლავროვთან შეხვედრის დეტალებზე სასაუბროდ. პარტიის ლდიერმა გიგი წერეთელმა ამის შესახებ დღეს ჟურნალისტებთან ისაუბრა:

"სწორი იქნება, თუკი მინისტრი მობრძანდება პარლამენტში, ეს იქნება ინსტიტუტის პატივისცემა, ვისაუბრებთ, რა იცვლება, რა შედეგი შეიძლება ჰქონდეს [შეხვედრას], რა უკუშედეგი შეიძლება ჰქონდეს".

გიგი წერეთლის თქმით, საქართველოსა და რუსეთის საგარეო საქმეთა მინისტრების შეხვედრამ დიდი ინტერესი გამოიწვია, ინფორმაციის ნაკლებობისა და, ასევე, არაერთგვაროვანი განცხადებების გამო:

"ლოგიკურია, რომ საზოგადოებასა და პარლამენტს აქვს ინტერესი, ჰქონდეს მეტი დეტალი, იცოდეს მეტი დეტალი, შესაბამისად, საქართველოს კონსტიტუციის რეგლამენტის თანახმად, იმ წესის თანახმად, რაც პარლამენტშია, უნდა მოვიდეს იქნება ეს მინისტრის საათი თუ იქნება ეს კომიტეტის ფორმატი".

ნიუ იორკში გაეროს გენერალური ასამბლეის ფარგლებში გამართულ ერთ-ერთი მაღალი დონის შეხვედრაზე საქართველოსა და რუსეთის საგარეო საქმეთა მინისტრები ერთმანეთს შეხვდნენ. 2008 წლის შემდეგ რუსეთ-საქართველოს საგარეო საქმეთა სამინისტროების წარმომადგენლებს დიპლომატიური კონტაქტი არ ჰქონიათ.