შინაგან საქმეთა სამინისტროს ინფორმაციით, ნარკოტიკული საშუალების უკანონო შეძენა-შენახვისა და გადაზიდვის ბრალდებით ჭიათურის მერიის არქიტექტურის, მშენებლობისა და ზედამხედველობის სამსახურის თანამშრომელი დააკავეს.

უწყების ცნობით, ბრალდებული სამართალდამცველებმა სამტრედიის სოფელ საჯავახოში მაშინ დააკავეს, როცა ის ცენტრალურ საავტომობილო გზაზე მანქანით გადაადგილდებოდა. მათივე ინფორმაციით, პირადი ჩხრეკისას ნარკოტიკული ნივთიერება მეტადონის შემცველი სითხე ნივთმტკიცებად ამოიღეს.

გამოძიება სისხლის სამართლის კოდექსის 260-ე მუხლის პირველი ნაწილით მიმდინარეობს, რაც ნარკოტიკული საშუალების უკანონო შეძენა-შენახვისა და გადაზიდვას გულისხმობს. ამ მუხლით გათვალისწინებულია პატიმრობა ექვს წლამდე. დაკავებული დანაშაულს აღიარებს.