"ლიდერად არავის არ აღვიქვამ სასამართლოში, ყოველგვარი ლიდერობა სასამართლოში მიუღებელია", — ასე უპასუხა უზენაესი სასამართლოს მოსამართლეობის კანდიდატმა შოთა გეწაძემ ლევან მურუსიძის, როგორც სასამართლო ლიდერთან დაკავშირებით დასმულ კითხვას.

სააპელაციო სასამართლოში უვადოდ დანიშნულმა მოსამართლემ, ლევან მურუსიძემ, საკუთარ თავს სასამართლოს ლიდერი უწოდა 27 დეკემბერს იუსტიციის უმაღლეს საბჭოში გამართულ მოსმენაზე.

მან თქვა, რომ არ არსებობს არავითარი კლანები, და რომ ის ლევან მურუსიძეა - სასამართლოს ლიდერი, რომ მას დანარჩენ მოსამართლეებთან აქვს ურთიერთობა და მათ აზრს წარმოადგენს და რომ ისინი სასამართლოს დამოუკიდებლობისთვის იბრძვიან.

ამ განცხადების შემდეგ, იუსტიციის უმაღლეს საბჭოში უზენაესის მოსამართლეობის კანდიდატებთან გასაუბრებისას საბჭოს არამოსამართლე წევრები სვამდნენ კითხვას: მიაჩნიათ, თუ არა ლევან მურუსიძე ლიდერად.

2015 წლის 25 დეკემბერს შოთა გეწაძემ მხარი დაუჭირა ლევან მურუსიძის სამწლიანი გამოსაცდელი ვადით მოსამართლედ დანიშვნას სააპელაციო სასამართლოში.

ერთ-ერთ სატელევიზიო გამოსვლაში კანდიდატმა ამ გადაწყვეტილებასთან დაკავშირებით განაცხადა: "ბატონი ლევან მურუსიძე, მე ვიტყოდი, იყო ყველაზე ღირსეული იმ კანდიდატთა შორის, რომლებიც მონაწილეობდნენ კონკურსში, სადაც აირჩა 38 მოსამართლე. მე ლევან მურუსიძეს ხმა მივეცი, რადგან ის, როგორც პროფესიონალი, იმსახურებდა ჩემს ერთ ხმას".