უზენაეს სასამართლოში მოსამართლეობის კანდიდატი მერაბ გაბინაშვილი ამბობს, რომ მოსამართლის ღირსების შელახვა დაკავშირებულია სასამართლოს ღირსების შელახვასთან. მისივე თქმით, შეურაცხყოფის მიყენებისას სასამართლოსგან თავს განყენებულად არ აყენებს.

"თითოეული მოსამართლის წინააღმდეგ გალაშქრება, თითოეული მოსამართლის მიმართ გამოხატული სიძულვილის ენა შესაძლებელია ძალიან ნეგატიურად აისახოს სასამართლოს კონტექსტზე. ჩემთვის, მაგალითად, ძალიან მძიმე იქნება კორუფციაში დადანაშაულება და ისეთი სახის მტკიცებულებებით მანიპულირება, რომელიც ხელოვნურია და ჩემ გარშემო მყოფ სოციუმს აჯერებს ჩემს არაკეთილსინდისიერებაში. მე ვთვლი, რომ ეს პირდაპირ კავშირშია, როგორც ჩემს პიროვნულ ღირსებასთან, ასევე სასამართლო სისტემის დამოკიდებულებასთან. განყენებულად არ ვაყენებ თავს ასეთი შეურაცხყოფის მიღების დროს. მე ყოველთვის ვფიქრობ, რომ ვარ სასამართლოს ნაწილი", — აღნიშნა გაბინაშვილმა.

მანამდე გაბინაშვილმა აღნიშნა, რომ გამოხატვის თავისუფლებასა და სასამართლოს ავტორიტეტის დაცვას შორის ბალანსი გავლებული უნდა იყოს:

"მედიის თავისუფლებას რაც შეეხება, აქ ინფორმაციის გადაცემის სტანდარტებთან გვაქვს საქმე. მედია ასრულებს თავის ფუნქციას, უნდა გადასცეს ინფორმაცია საზოგადოებას, მაგრამ ევროპული სასამართლოს პრეცედენტები აწესებს დასაშვები კომენტარის სტანდარტს და ამბობს, რომ ინფორმაციის გადაცემამ საფრთხე არ უნდა შეუქმნას სხვა ღირებულების დარღვევას, როგორიცაა სასამართლოს ავტორიტეტი, სხვისი ღირსება".

უზენაესის მოსამართლეების კანდიდატებთან პარლამენტში გასაუბრება 23 სექტემბერს დაიწყო. პარლამენტში შექმნილია სამუშაო ჯგუფი, რომლის ფარგლებში გაიმართება შეხვედრა თითოეულ კანდიდატთან. ამ ეტაპზე მოსამართლეებს იურიდიულ საკითხთა კომიტეტის სხდომაზე უსმენენ.

20-კაციანი სია იუსტიციის უმაღლესმა საბჭომ 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.

ვინ არის მერაბ გაბინაშვილი

მერაბ გაბინაშვილი თბილისის საქალაქო სასამართლოს უვადო მოსამართლეა. 2006-2012 წლებში იგი მოსამართლედ მუშაობდა გორისა და ზესტაფონის რაიონულ და ქუთაისის საქალაქო სასამართლოში.

2019 წლის 2 ივლისს მოსამართლე მერაბ გაბინაშვილმა განიხილა პარლამენტის დეპუტატის, ნიკა მელიას საქმე და საქალაქო სასამართლოს მიერ შეფარსებული აღკვეთი ღონისძიება, 30 ათასი ლარის ოდენობით გირაო და დამატებითი შეზღუდვები, ძალაში დატოვა.

მერაბ გაბინაშვილი 2013-2017 წლებში იყო იუსტიციის უმაღლესი საბჭოს წევრი. ამავე პერიოდში თბილისის საქალაქო სასამართლოს თავმჯდომარე მამუკა ახვლედიანი თანამდებობიდან გაათავისუფლეს და გამჟღავნდა მოსამართლეთა საგამოცდო ტესტები.

ფონდის ექსპერტები მიუთითებენ იმაზე, რომ მერაბ გაბინაშვილის იუსტიციის უმაღლესი საბჭოს წევრობის პერიოდში აქტიურად გამოიყენებოდა მოსამართლეთა უკონკურსოდ გადაყვანისა და დაწინაურების მექანიზმი. მოსამართლე გაბინაშვილის იუსტიციის უმაღლესი საბჭოს წევრობის პერიოდში საბჭომ მხარი დაუჭირა ლევან მურუსიძისა (3 წლის ვადით) და მიხეილ ჩინჩალაძის (უვადოდ) თბილისის სააპელაციო სასამართლოს მოსამართლეებად გამწესებას.

ამავე თემაზე: