ჩვენმა მკითხველმა უკვე იცის, რომ 10 სექტემბერს, თბილისის დროით 21:00 საათზე ეფლმა თავის ახალ აიფონებთან ერთად, საზოგადოებას მობილური ოპერაციული სისტემის, iOS-ის განახლებული ვერსიაც წარუდგინა.

iOS 13-ის საკუთარ დევაისზე ჩამოტვირთვისა და დაყენების შესაძლებლობა კი დღეს, 20 სექტემბერს ეფლის თითოეულ მომხმარებელს მიეცა.

პირველი რაც თვალში მოგხვდებათ, განახლებული Dark Mode-ის რეჟიმია, რომელიც ლამაზიც არის და ელემენტს ენერგიის დაზოგვის საშუალებასაც აძლევს.

აქვეა 4 სრულიად ახალი ეკრანის ფონი, რომელიც სურვილისამებრ უფრო ნათელი, ან შედარებით ჩაბნელებული ხდება.

ფოტო: 9to5mac

და ეს ყველაფერი არ არის — ასევე განახლდა უამრავი აპლიკაცია, რომლებიც ახლა გაცილებით კომფორტული და მრავალფუნქციურია.

მაგალითად, განახლებულ Apple Maps-ს ქუჩის 360-გრადუსიან ხედი და საყვარელი ადგილების მონიშვნის ფუნქცია დაემატა.

ფოტო: Apple

ლამაზი ფოტოების მოყვარულებს ეფლმა ასევე კარგი საჩუქარი გაუკეთა და iOS-ის განახლებულ ვერსიაში ფოტოს დამუშავების 15 განსხვავებული გზა შესთავაზა. გამარტივებულია ვიდეოს დამუშავებაც

განახლდა მუსიკის აპლიკაციაც, რომლის მეშვეობითაც თან მუსიკას მოუსმენთ და თან სიმღერის ტექსტსაც დაინახავთ.

Reminders-ის, Notes-ისა და Safari-ის აპლიკაციებშიც გელოდებათ სიახლეები — აქამდე თუ აიფონში სხვადასხვა ფაილის ჩამოტვირთვა შეუძლებელი იყო, ახლა უკვე Safari-ის მეშვეობით ტელეფონში მარტივად გადმოიწერთ სიმღერებსა და ვიდეოებს.

და ბოლოს, აღსანიშნავია, რომ iOS 13-ის დაყენება iPhone 6S, 6S Plus, iPhone SE, iPhone 7, 7 Plus, iPhone 8, 8 Plus, iPhone X, iPhone XS, XS Max, XR, iPhone 11, 11 Pro და 11 Pro Max-ზეა შესაძლებელი.