"არ მგონია, რომ მტერია, მაგრამ ქართველი კაცია და მგონია, რომ ეს ქვეყანა უყვარს", — ასე უპასუხა ბიზნესმენმა მამუკა ხაზარაძემ გადაცემა მთავარ აქცენტებში დასმულ შეკითხვას, ბიძინა ივანიშვილი საქართველოს მტერი არის თუ არა.

"მაგრამ ვფიქრობ, რომ ეს მოვლენები, რაც სისტემურ ხაზს იძენს ჩემი ქვეყნის მომავლისთვის კარგი არ არის", — დაამატა ხაზარაძემ.

მისივე თქმით, ბიძინა ივანიშვილს რაღაც ვალდებულებები აქვს რუსეთის მიმართ და ის "ამ ვალდებულებების ტყვეობაში არის".

"დაუძახო ქართველ კაცს მტერი, არის ძალიან სერიოზული ბრალდება. ვფიქრობ, რომ იმ ვალდებულებებიდან და ქმედებებიდან გამომდინარე, რომელიც ხდება ჩვენს ქვეყანაში, ეს ადამიანი ვერ ხვდება რა კურსი აირჩიოს. მიდის თამაში დასავლეთსა და ჩრდილოეთ შორის", — აღნიშნა ხაზარაძემ.

12 სექტემბერს მამუკა ხაზარაძემ თავისი საზოგადოებრივი მოძრაობის ლელოს პრეზენტაცია მოაწყო. პრეზენტაცია ანაკლიაში, ზღვის ნაპირზე გაიმართა. როგორც ხაზარაძე ამბობს, ორგანიზაციაში ის სხვადასხვა სფეროს 12-12 ლიდერს გააერთიანებს.

ხაზარაძემ საზოგადოებრივი მოძრაობის დაფუძნება 9 ივლისს დააანონსა. ხაზარაძემ მაშინ თქვა, რომ ქვეყანაში ბოლო დროს მიმდინარე პროცესები საგანგაშო ფორმებს იღებს და "სახეზეა ჩვენი საზოგადოების გახლეჩვისა და დაპირისპირების მიზანმიმართული პროცესი". მისივე თქმით, 20 ივნისის ღამე იყო ის წყალგამყოფი, როდესაც "ჩვენმა ღირსეულმა და თავისუფალმა ახალგაზრდობამ გულწრფელი და მტკიცე პროტესტი გამოხატა ოკუპაციისა და ძალადობის წინააღმდეგ. ეს პროტესტი არის უწყვეტი, ისტორიული პროცესისა და ჩვენი ქვეყნის დამოუკიდებლობისთვის ბრძოლის გაგრძელება".